Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 341 Hüküm no: 391 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani bt. Mustafa’nın, menkul ve gayri menkul eşyalarını Yazıcı Ali b. Hüseyin’e hibe ettiği Vilâyet-i Anadolu’da Yalakābâd kazâsına tâbi‘ Tahtânî Dere nâm karye sâkinelerinden Ümmühâ[ni] bt. Mustafa nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isü’l-kitâb Yazıcı Ali b. Hüseyin nâm kimesne mahzarında bi’t-tav‘i’s-sâf ikrâr ve i‘tirâf edip hibe-i âtiyyetü’z-zikrin sudûruna değin yedimde mülk ve hakkım olan bir çift su sığırı öküzlerimi ve iki su sığırı ineğimi ve bir su sığırı boğasını ve dört yorgan ve üç döşek ve üç minder ve beş yastık ve iki kazan ve iki tencere ve beş sahan ve üç pekmez tavamı ve karye-i mezbûrede vâki‘ bir tarafdan müezzin el-Hâc ( ) nâm kimesne mülkü ve bir tarafdan Yusuf nâm kimesne mülkü ve bir tarafdan Eyüb Reis mülkü ve bir tarafdan tarîk-i âm ile mahdûd bir kıt‘a mülk bağımı ve yine karye-i mezbûrede vâki‘ beyne’l-ahâlî ve’l-cîrân ma‘lûmü’l-hudûd büyût-ı adîdeyi müştemil mülk menzilimi fâriğan ani’ş-şevâgil mukaddemâ mezbûr Yazıcı Ali’ye hibe-i sahîha-i şer‘iyye ile hibe ve teslîm, mezbûr Yazıcı Ali dahi hibe-i mezbûreyi meclis-i hibede ittihâb ve kabûl ve kabz ve tesellüm eylemiş idi, eşyâ-i mezbûre ve zikr olunan bağ ve menzil merkūm Yazıcı Ali’nin mülk-i mevhûbudur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Recebi’l-ferd li sene seb‘a ve seb‘în ve elf. Şuhûdü’l-hâl: İbrahim Beşe b. Hüseyin, Hüseyin Çelebi b. Abdullah el-Müezzin, Mustafa Çelebi b. Hasan, Mehmed b. Hüseyin, Seydî b. Receb, Mustafa b. Hüseyin, el-Hâc Mehmed b. el-Hâc Hasan, Abdülbâkī Çelebi b. Mehmed, Şükrullah Bey.