Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 341 Hüküm no: 390 Orijinal metin no: [53b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Durmuş b. Hasan’ın, Fâtıma bt. Hüseyin’den câriye bedelinden alacaklı olduğu Mahmiye-i İstanbul’da Mi‘mâr Sinan mahallesi ahâlîsinden bâ‘isü’l-kitâb Durmuş b. Hasan nâm kimesne meclis-i şer‘de Fâtıma bt. Hüseyin nâm hâtun mahzarında üzerine da‘vâ ve takrîr-i kelâm edip mezbûre Fâtıma, Hacı Mustafa nâm kimesnenin câriye-i memlûkesi olan evsâfı beynimizde ma‘lûme Macariyyetü’l-asl Gonca bt. Abdullah’ı yetmiş beş esedî guruşa fuzûlen bana bey‘ ve teslîm ve semeninden yirmi esedî guruşu yedimden ahz u kabz ve istihlâk ettiğinden sonra mezbûr Hacı Mustafa bey‘-i mezbûru mücîz olmayıp mevsûfe-i mezbûreyi yedimden alıp yirmi beş esedî guruşa mezbûre Fâtıma’nın zimmetinde kalmışidi, suâl olunup alıverilmek matlûbumdur dedikde gıbbe’s-suâl mezbûre Fâtıma kaziyye minvâl-i muharrer üzre olduğunu tâyi‘aten ikrâr ve i‘tirâf etmeğin mûcebince meblağ-ı mezbûr yirmi beş esedî guruşu müdde‘î-i mezbûra teslîme mezbûre Fâtıma’ya tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-hâmis min Recebi’l-ferd li sene seb‘a ve seb‘în ve elf. Şuhûdü’l-hâl: İbrahim Beşe b. Derviş, Mustafa b. Süleyman, Mehmed b. Ahmed, Yusuf b. Abdullah, Mehmed b. Abdullah Kethüdâ ve gayruhüm.