Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 155 Hüküm no: 120 Orijinal metin no: [19b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın Şeyh Osman Efendi Zaviyesi Vakfı’ndaki rehin evini geri alması Mahmiye-i İstanbul hısnı ebvâbından Eğrikapı dâhilinde merhûm eş-Şeyh Osman Efendi zâviyesi’nin vakf eylediği nukūda mütevellî olan ve vâkıf-ı mezbûrun sulbî oğlu fahrü’l-hutebâ Mehmed Efendi meclis-i şer‘-i şerîfde medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Sofular mahallesi sâkinelerinden Belkıs bt. Abdullah nâm hâtun muvâcehesinde ikrâr ve takrîr-i kelâm edip mütevellîsi olan vakf-ı mezbûr malından mezbûre Belkıs zimmetinde on esedî guruş olup mukābelesinde silk-i mülk-i sahîhinde münselik olup mahalle-i mezbûrede vâki‘ bir tarafı Osman b. Mustafa mülkü ve bir tarafı Şahbaz bt. Abdullah mülkü ve bir tarafı Emine bt. Abdullah mülkü ve bir tarafı tarîk-i âm ile mahdûd olan mülk menzilini cânib-i vakf için rehin vaz‘ ve teslîm ben dahi irtihân ve kabûl eylemişidim hâlâ meblağ-ı merkūm on guruşu mezbûre Belkıs yedinden bi’t-tamâm ahz ve kabz edip fekk-i rehin eyledim min ba‘d meblağ-ı merkūmdan mezbûre Belkıs Hâtun zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâdis aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Ahmed Efendi b. Mehmed, Mehmed Çelebi b. Hüseyin, Ömer Bey b. Şaban, Süleyman b. Ali ve gayruhüm.