Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 154 Hüküm no: 119 Orijinal metin no: [19b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Mustafa’nın Ali b. Abdullah’a evini satıp dört adet tarlasının tasarruf hakkını devretmesi Havâss-ı Aliyye kazâsına tâbi‘ Cebeci nâm karye ahâlîsinden Ramazan b. Mustafa nâm kimesne meclis-i şer‘-i şerîfde işbu râfi‘ü’l-kitâb Ali b. Abdullah mahzarında ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafı beylik çayır bahçesi ve bir tarafı Hızır Beşe b. Abdullah mülkü ve bir tarafı mekābir-i müslimîn ve bir tarafı tarîk-i âm ile mahdûd bir bâb fevkānî oda ve altında ahır ve muttasıl bir kıt‘a bağı müştemil olup arsasının senedi merhûm ve mağfûrun-leh Sultan Bayezid Han evkāfı’na on akçe mukāta‘ası olan mülk menzilimi cemî‘ tevâbi‘i ile mezbûr Ali’ye elli esedî guruşa bey‘ ve teslîm edip ol dahi minvâl-i muharrer üzre iştirâ ve kabûl ve kabz eyledikden sonra yine karye-i mezbûre sınırı dâhilinde mevâzi‘-i müteferrikada vâki‘ her hudûdu beynimizde ma‘lûm dört kıt‘a tarlalarımın dahi hakk-ı tasarruflarını ma‘rifet-i sâhib-i arz ile mezbûr Ali’ye yirmi esedî guruş mukābelesinde tefvîz bi’l-ferâğ edip ol dahi tefevvuz ve kabûl eyledikden sonra semen-i mezbûr ile bedel-i merkūmdan müctemi‘ olan yetmiş esedî guruşun beş guruşunu kendiye hibe-i sahîha-i şer‘iyye ile hibe ve teslîm ol dahi meclis-i hibede ittihâb ve tesellüm ve kabz ve kabûl eyledikden sonra bâkī altmış beş guruşdan hâlâ kırk beş guruşunu mezbûr Ali yedinden ahz ve kabz eyleyip bâkī yirmi esedî guruşunu hâlâ edâya iktidârı olmamağla târih-i kitâbdan iki yüz elli gün tamâmına değin bana edâya te’cîl eyledim ba‘de’l-yevm emlâk-i mezbûrede ve arâzi-i merkūmede alâka ve medhalim yokdur, emlâk-i mezbûre merkūm Ali’nin mülk-i müşterâsı ve arâzi-i merkūme dâhil-i taht-ı tasarrufu olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-hâmis aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Hızır Beşe b. Mustafa, Mehmed b. Ömer, Mehmed b. Eyüb, Mehmed b. Mahmud, Ali b. Abdullah, Hasan b. Abdullah.