Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 156 Hüküm no: 122 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın evini İbrahim Ağa b. Durmuş’a satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Baba Haydar mahallesi sükkânından Mehmed b. Abdullah nâm kimesnenin kayınanası ve tarafından husûs-ı âti’l-beyânı ikrâra vekîl olup hasm-ı câhid mahzarında Abdullah b. Osman ve Sefer b. Mehmed nâm kimesneler şehâdetleriyle şer‘an vekâleti sâbite olan Mustafa Çelebi b. Elvan meclis-i şer‘-i hatîr-i lâzımü’t-tevkīrde işbu râfi‘ü’l-kitâb fahrü’l-emâsil ve’l-eşbâh İbrahim Ağa b. Durmuş tarafından ikrâr-ı âti’z-zikri tasdîke vekîl-i sâbitü’l-vekâlesi olan Ali Efendi b. Hüseyin mahzarında bi’l-vekâle ikrâr-ı tâm ve takrîr-i kelâm edip müvekkilim mezbûr Mehmed akd-i câ’i’z-zikrin sudûruna değin silk-i mülk-i sahîhinde münselik olup mahalle-i mezbûrede vâki‘ bir tarafdan Mustafa Çavuş b. Receb tasarrufunda olan vakıf menzil ve bir tarafdan Bostânî Mehmed Bey mülkü ve bir tarafdan Ümmühâni Hâtun mülkü ve bir tarafdan tarîk-i âm ile mahdûd iki tahtânî oda ve iki sofa ve mezbûre Ümmühâni ile müşterek bir su kuyusu ve zât-ı eşcâr-ı müsmire ve gayr-ı müsmire bahçe ve bahçe içinde bir sagīr tahtânî bir odayı müştemil menzilini bi cümleti’t-tevâbi‘ ve’l-levâhık müvekkil-i mezbûr İbrahim Ağa’ya yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mastûr yüz guruşu müvekkil-i mûmâ-ileyh İbrahim Ağa yedinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur, müvekkil-i mezbûr İbrahim Ağa’nın mülk-i müşterâsı olmuşdur keyfe mâ yeşâ’ mutasarrıf olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’t-tâsi‘ aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Receb Efendi b. Yusuf el-İmâm, Mustafa Halîfe b. Musa el-Müezzin, İsmail Bey b. Mustafa, Ahmed Çelebi b. Emrullah, Yusuf Dede b. Ali, el-Hâc Yusuf b. Mehmed, Hasan [b.] Abdullah.