Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 157 Hüküm no: 123 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saraç Ahmed b. Mehmed’e vurup dişini kıran Mustafa b. Bayram’ın diyet ödemesi Hâssa sarrâclarından işbu râfi‘ü’l-kitâb Ahmed b. Mehmed nâm kimesne mahfil-i kazâda yine sarrâc şâkirdlerinden Mustafa b. Bayram nâm kimesne mahzarında üzerine da‘vâ ve takrîr-i kelâm edip târih-i kitâbdan on gün mukaddem gece ile hadîka-i Davudpaşa önünde çadır içinde mezbûr Mustafa bi gayri hakkın sağ yediyle benim ağzıma darb etmek ile ol darbdan nâşî ağzımın alt tarafında olan dişlerimden birini ihrâc eyledi. Hattâ mezbûr Mustafa vech-i mübeyyen üzre benim dişimi bi gayri hakkın ihrâc eylediğini huzûr-ı müslimînde ikrâr dahi etmişdir hâlâ ba‘de’l-müşâhede suâl olunup takrîri tahrîr ve mûceb-i şer‘îsi icrâ olunmak matlûbumdur deyû ihrâc olunan dişi meclis-i şer‘de izhâr ve müşâhede olundukda fi’l-hakīka mezbûr Ahmed’in ağzının alt tarafında olan dişlerinden biri ihrâc olunduğu zâhir ve mütehakkik olup mezbûr Mustafa’ya suâl olundukda inkâr ile cevâb vermeğin müdde‘î-i mezbûrdan sıdk-ı makālini mübeyyine beyyine taleb olundukda udûl-i ahrâr-ı ricâlden olup sarrâc-ı hâssa şâkirdlerinin bölükbaşısı olan Süleyman Bey b. Elvan ve sarrâc-ı hâssa şâkirdlerinden Mustafa b. Şaban ve Receb b. Dede nâm kimesneler li ecli’ş-şehâde makām-ı kazâya hâzırûn olup istişhâd olunduklarında fi’l-hakīka mezbûr Mustafa müdde‘î-i merkūm Ahmed’in sâlifü’l-beyân dişini ber vech-i muharrer ben çıkardım deyû bizim huzûrumuzda kirâren ve mirâren ikrâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle nısf öşr-i diyetin lüzûmuna ba‘de’l-hükm, mâ hüve’l-vâki‘ kayd şüd. Fi’l-yevmi’s-sâbi‘ aşer min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed Bey b. Hasan, Ali b. Yahya, Mehmed b. Eyüb, Mehmed b. Mahmud, Ali b. Abdullah, Hasan b. Abdullah.