Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 342 Hüküm no: 393 Orijinal metin no: [54a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mustafa b. Muhtar’ın, vârissiz ölen Hüseyin b. Ahmed’deki câriye bahasından olan alacağını beytülmâlden tahsil etmesi için defterdar kaymakamı Mehmed Paşa’ya tembihte bulunduğu Bi’l-fi‘l vilâyet-i Rumeli’nde Medîne-i Hacıoğlupazarı kadısı olan Şeyh Mehmed Efendi b. İsmail kıbelinden hat ve hatmini hâvî târih-i kitâb senesi Cumâdelâhiresi evâsıtıyla müverrah el-Hâc Mustafa b. Muhtar nâm kimesne yediyle nakl-i şer‘î vârid olup mazmûnu kasaba-i Hacıoğlupazarı mahallâtından Hacı Umur mahallesinde sâkin bâ‘is-i hâze’l-kitâb el-Hâc Mustafa b. Muhtar nâm kimesneden meşhûdiyyet-i âti’l-beyân vech üzre da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra udûl-i müslimîn ve sikāt-ı müminînden olup kasaba-i mezbûre mahallâtından Hacı Nasuh mahallesi sükkânından Himmet Beşe b. Mehmed b. Ali ve Ahmed Beşe b. İbrahim b. Mehmed nâm kimesneler nakl ve tahvîl için mahall-i cerh ve ta‘dîl li ecli’ş-şehâde hâzırân olup kasaba-i mezbûre mahallâtından Hacı Hamza mahallesi sükkânından olup hâlâ medîne-i Kostantıniyye’de vâki‘ Vezir hanı’nda sâkin iken bilâ-vâris fevt olmağla muhallefâtı beytülmâl emîni yedinden mazbût olduğu mesmû‘umuz olan Hüseyin b. Ahmed nâm kimesne zimmetinde müdde‘î-i mezbûr el-Hâc Mustafa Bey[’in] câriye bahâsından yüz esedî guruş hakkı olup meblağ-ı mezbûr müteveffâ-yı merkūm zimmetinde iken fevt olmağla müdde‘î-i mezbûr için müteveffâ-yı merkūmun muhallefâtından hakk-ı taleb ve ahz vardır, biz bu husûsa bu vech üzre şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukdan sonra müsteşhid-i mezbûr müteveffâ-yı merkūmdan meblağ-ı mezbûru küllen ve ba‘zen ahz ve istîfâ veya hibe veyâhud bir tarîk ile müteveffâ-yı merkūmun zimmetini ibrâ etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ ettiğini hâvî bulmağın kitâb-ı mezbûr merkūm el-Hâc Mustafa talebiyle tereke-i müteveffâ-yı mezbûra vâzı‘ü’l-yed olup Medîne-i mezbûrede kāimmakām-ı defterdâr-ı şıkk-ı evvel olan Emîrü’l-ümerâ’i’l-kirâm kebîrü’l-küberâi’l-fihâm zü’l-kadri ve’l-ihtirâm sâhibü’l-izzi ve’l-ihtişâm Mehmed Paşa -dâme birruhû ve feşâ- mahzarında feth ve kırâat ve istintâk olundukda mûmâ-ileyh Mehmed Paşa kitâb-ı mezbûrun mevlânâ-yı mezkûr kıbelinden vürûdunu inkâr etmeğin mezbûr el-Hâc Mustafa’dan kitâb-ı mezbûr, mevlânâ-yı merkūm kıbelinden vârid kitâbı ve zeylinde olan hat ve hatm dahi hat ve hatmi olduğuna beyyine taleb olundukda kitâb-ı mezbûrun zeylinde isimleri terkīm olan şuhûd-ı tarîkden el-Hâc Ali Bey b. İshak ve el-Hâc Mustafa Çelebi b. Kılıç ve el-Hâc Veli b. Piyâle nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka kitâb-ı mezbûr mevlânâ-yı mezbûrun kıbelinden vârid kitâbı ve zeylinde olan hat ve hatm dahi hat [ve] hatmidir mevlânâ-yı mezbûr kitâb-ı mezbûru zeylinde isimlerimizi yazdıkdan sonra huzûrumuzda imzâ ve mühürleyip hat ve hatmine bizi işhâd eyledi, biz husûsa bu vech üzre şâhidiz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın meblağ-ı mezkûru tereke-i müteveffâ-yı mezbûrdan müsteşhid-i merkūm el-Hâc Mustafa’ya edâ ve teslîme mûmâ-ileyh Mehmed Paşa hazretlerine ba‘de’t-tenbîh mâ vaka‘a bi’l-ibtigā ketb ve imlâ olundu. Fi’l-yevmi’s-sâmin [min] Recebi’l-mürecceb li sene seb‘a ve seb‘în ve elf. Şuhûdü’l-hâl: Umdetü’l-emâcid ve’l-ekârim Çavuşbaşı İsmail Ağa, umdetü’l-emâsil ve’l-a‘yân Eyüb Ağa Kethüdâ-yı hazret-i efendi, fahrü’l-akrân Şaban Ağa b. Süleyman Ser-muhzırân, fahrü’l-eşbâh Hasan Beşe b. Abdullah Çukadâr.