Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 175 Hüküm no: 140 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Sefer’in kaçak köle davasının reddi Tersâne-i âmire’de sâkin demirci çingenelerinden Mustafa b. Sefer mahfil-i kazâda medîne-i Hazret-i Ebâ Eyyûb el-Ensârî’de çömlekçi tâifesinden işbu hâmilü’r-rakīm Ohan v. Murat nâm Ermeni muvâcehesinde üzerine da‘vâ ve takrîr-i kelâm edip târih-i kitâbdan on beş gün mukaddem Rûsiyyü’l-asl Gavril nâm abd-i memlûküm mülkümden ibâk etmişidi hâlâ merkūm Ohan medîne-i merkūme tevâbi‘inden Müderrisköyü demekle ma‘rûfe karyede vâki‘ taht-ı icâresinde olan çiftlik kurbunda târih-i mezkûrda ahz ve kabz ettiğini istimâ‘ eyledim hâlâ suâl olunup takrîri tahrîri ve abd-i merkūmu bana teslîme tenbîh olunmak matlûbumdur dedikde gıbbe’s-suâl ve akībe’l-inkâr ve isre talebi’l-beyyine mezbûr Mustafa ityân-ı beyyineden izhâr-ı acz etmek ile istihlâf etmeğin fi’l-vâki‘ mezbûr Mustafa’nın abd-i memlûkü olan gulâmı târih-i merkūmda ber vech-i muharrer karye-i mezbûrede vâki‘ taht-ı icâresinde olan çiftlik-i mezbûr kurbunda ahz edip âhara bey‘ etmediğine yahud hâlâ yedinde olmadığına mersûm Ohan’a yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebiyle müdde‘î-i mezbûr Mustafa gulâm-ı mezkûra müte‘allika merkūm Ohan’a bî-vech ta‘arruzdan men‘ birle mâ vaka‘a kayd şüd. Fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Ali b. Abdullah, Hüseyin b. Ali, Dilâver b. Abdullah, Hasan b. Abdullah.