|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 175 Hüküm no: 141 Orijinal metin no: [23a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Afife bt. Mustafa’nın evini Fâtıma bt. Mustafa’ya satması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Takyecibaşı mahallesi sâkinelerinden fahrü’l-muhadderât Afîfe Hâtun bt. Mustafa nâm hâtun husûs-ı âti’l-beyânı ikrâra vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Receb Efendi b. Yusuf ve Receb Çavuş b. Hasan şehâdetleri ile şer‘an vekâleti sâbite olan Hüseyin Ağa b. Hasan meclis-i şer‘-i hatîr-i lâzımü’t-tevkīrde işbu râfi‘atü’l-kitâb Fâtıma Hâtun bt. Mustafa tarafından ikrâr-ı âti’z-zikri tasdîke vekîl-i sâbitü’l-vekâlesi olan Şaban Çelebi b. Halil mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Afîfe Hâtun akd-i câ’i’z-zikrin sudûruna değin silk-i mülk-i sahîhinde münselik olup mahalle-i mezbûrede bir tarafı Takyecibaşı vakfı ve bir tarafı merhûm Abdülkādir Efendi vakfı ve bir tarafdan Ali Usta b. Ahmed mülkü ve bir tarafı tarîk-i âm ile mahdûd fevkānî ve tahtânî üç bâb odalar ve bir sofa ve bir mikdâr bahçe ve havluyu müştemil mülk menzilini cemî‘ tevâbi‘ ve levâhıkı ile müvekkile-i mezbûre Fâtıma Hâtun’a yüz on kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mastûr yüz on guruşu müvekkile-i mezbûre Fâtıma Hâtun yedinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur, müvekkile-i mezbûre Fâtıma Hâtun’un mülk-i müşterâsı olmuşdur keyfe mâ teşâ’ mutasarrıfe olsun dedi dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sânî min şehri Ramazâni’l-mübârek li sene tis‘în ve elf.
Şuhûdü’l-hâl: Receb Efendi b. Yusuf el-İmâm, Receb Çavuş b. Hasan, Yusuf Berber b. Ali, Süleyman b. Ali, Mehmed Çelebi b. Abdülaziz, Mehmed b. İbrahim, Mehmed b. Mustafa.
|