Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 218 Hüküm no: 203 Orijinal metin no: [30a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abraham v. Kanber’in Ekmekçi Donvak v. Mıgırdiç’a borcunu ödemesi Medîne-i Hazret-i Eyyûb Ensârî -radiye anhu Rabbühü’l-Bârî-’de habbâz tâifesinden Donvak v. Mıgırdiç nâm Ermeni asâleten ve şerîki Kestosdor v. Todora nâm Ermeni husûs-ı âti’l-beyâna kendi tarafından asl ve li ebeveyn er karındaşı Tatol nâm Ermeni tarafından dahi vekîl-i sâbitü’l-vekâlesi olmağın vekâleten meclis-i şer‘-i şerîfde işbu râfi‘ü’r-rakīm Abraham v. Kanber nâm Ermeni muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip bundan akdem merkūm Abraham’dan on yedi bin beş yüz akçe ve iki re’s bârgir ile on iki keyl dakīk taleb ve da‘vâ etmişidik el-hâletü hâzihî asâlet ve vekâletim hasebiyle meblağ-ı mezkûr on yedi bin beş yüz akçe ve bârgirler ile dakīkden mastûr Abraham’ın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene tis‘în ve elf. Şuhûdü’l-hâl: El-Hâc Veli b. Eyüb, el-Hâc Hüseyin Beşe b. İbrahim Çukadâr, Abdülbâkī Çelebi b. Mehmed, İbrahim Beşe b. Hüdâverdi, Hüseyin Beşe b. Hasan, Ahmed Beşe b. Ali, Hüseyin Bey b. Halil, Mustafa b. Veli.