Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 217 Hüküm no: 202 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülbûy bt. Abdullah’ın eski kocası Mehmed b. Ramazan’ın zimmetini ibra etmesi Mahrûse-i Galata’da Okçu Musa mahallesi sâkinelerinden Gülbûy bt. Abdullah nâm hâtun meclis-i şer‘-i hatîr-i lâzımü’t-tevkīrde medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- de Şah Sultan mahallesi sükkânından olup zevc-i mutallıkı olan işbu râfi‘ü’l-kitâb Mehmed b. Ramazan tarafından husûs-ı âti’l-beyâna vekîl olup hasm-ı câhid mahzarında Mustafa b. Süleyman ve diğer Mustafa b. Mehmed şehâdetleriyle şer‘an vekâleti sâbite olan Mustafa b. İbrahim mahzarında bi tav‘ihâ ikrâr-ı tâm ve takrîr-i kelâm edip müvekkil-i mezbûr Mehmed mukaddemâ zevcim olup beni tatlîk etmekle zimmetinde mütekarrir ve ma‘kūdun-aleyh olan üç bin akçe mehr-i müeccel hakkım kalmışdı hâlâ taleb [ve] da‘vâ eylediğimde ol dahi mehrinden fâriğa olmuşidin deyû cevâb vermeğin beynimizde münâza‘ât-ı kesîre vukū‘undan sonra beynimizde muslihûn-ı müslimûn tavassut edip meblağ-ı mezkûr da‘vâsından vekîl-i mezbûr Mustafa ile beni altı yüz altmış akçe üzerine inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı mezkûr altı yüz altmış akçeyi vekîl-i mezbûr Mustafa yedinden tamâmen ahz ve kabz edip mehr-i müeccelime müte‘allik da‘vâdan müvekkil-i mezbûr Mehmed’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-ışrîn min Şevvâli’l-mükerrem li sene tis‘în ve elf. Şuhûdü’l-hâl: Mehmed Çelebi b. Mehmed, Himmet Beşe b. Abdullah, Eyüb Beşe b. Abdullah, el-Hâc Mehmed b. Abdülmennân, Hasan b. Abdullah, Eyüb b. Mehmed, Habbâz Himmet.