Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 219 Hüküm no: 205 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Abdülvehhab b. Hicazî ile Yusuf Ağa b. Ebûbekir’in alacak davasında anlaşma sağlanması Husûs-ı âti’z-zikrin mahallinde ketb ve tahrîri iltimâs olunmağın savb-ı şer‘-i münîrden mevlânâ Abdüsselâm Efendi b. Nasuh irsâl olunup ol dahi medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- de Câmi‘-i Kebîr mahallesinde sâkin umdetü’l-ekârim ve’l-e‘âlî câmi‘ü’l-mehâmidü’l-me‘âlî Dürrî Mehmed Efendi b. Ali’nin sa‘âdet-hânelerine varıp akd-i meclis-i şer‘-i şerîf eyledikde fi’l-asl vilâyet-i Anadolu’da mahrûse-i Halebü’ş-şehbâ sükkânından olup hâlâ mahmiye-i İstanbul’da merhûm ve mağfûrun-leh Ebü’l-feth Sultan Mehmed Hân-ı Gāzi câmi‘-i şerîfi kurbunda Semerciler hanında müsâfiren sâkin olan es-Seyyid Abdülvehhab b. Hicâzî meclis-i ma‘kūd-ı mezbûrede, sâbıkan Haleb muhassılı olan işbu râfi‘ü’l-kitâb fahrü’l-akrân zahrü’l-a‘yân Yusuf Ağa b. Ebûbekir mahzarında tav‘an ikrâr ve takrîr-i kelâm edip mûmâ-ileyh Yusuf Ağa târih-i kitâbdan bir sene mukaddem mahrûse-i mezbûrede muhassıl iken benden bi gayri hakkın üç bin beş yüz esedî guruşumu ahz ve kabz etmişidi el-hâletü hâzihî meblağ-ı mezbûru da‘vâ ve taleb eylediğimde mezbûr Yusuf Ağa inkâr ile cevâb vermeğin ben dahi ityân-ı beyyine sadedinde iken beynimizde müslimûn-ı muslihûn tavassut edip meblağ-ı mezbûr üç bin beş yüz guruşdan bin yedi yüz elli esedî guruş üzerine inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı mezkûr bin yedi yüz elli esedî guruşu mûmâ-ileyh Yusuf Ağa yedinden bi’t-tamâm ve’l-kemâl ahz ve kabz eyledim dedikde gıbbe’t-tasdîki’ş-şer‘î mezbûr Abdülvehhab Efendi i‘âde-i kelâm edip meblağ-ı bâkī bin yedi yüz elli guruşdan mûmâ-ileyh Yusuf Ağa’nın zimmetini taht-ı sulhda gayr-ı dâhil ibrâ-i âm ve kātı‘ü’n-nizâ‘ ile ibrâ ve iskāt eyledim dedikde mûmâ-ileyh Yusuf Ağa dahi bedel-i sulh-ı mezkûra müte‘allik da‘vâdan mezbûr Abdülvehhab Efendi’nin zimmetini ibrâ-i âm ile ibrâ eyledim demeğin vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Beşe b. Hüseyin ve Muhzır Dilâver b. Abdullah ile meclis-i şer‘a gelip alâ vukū‘ihi inhâ ve ikrâr etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem li sene tis‘în ve elf. Şuhûdü’l-hâl: Umdetü’l-ekârim ve’l-a‘lâ Dürrî Mehmed Efendi b. Ali, umdetü’l-meşâyih eş-Şeyh Yahya Efendi b. eş-Şeyh Şaban Efendi, mefharü’l-ekâbir el-Hâc Mustafa Ağa b. Hüseyin, fahrü’l-akrân Osman Ağa b. Mehmed.