Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 219 Hüküm no: 206 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Ahmed’in vakfa ait ev hususundaki mülkiyet davasının reddi Mahmiye-i İstanbul’da Sultan Selim sûku kurbunda Kovacı Dede mahallesi sükkânından Hasan Beşe b. Ahmed nâm kimesne meclis-i şer‘-i şerîfde zikri âtî menzile vâzı‘ü’l-yed olan işbu râfi‘atü’l-vesîka Âişe bt. Mehmed nâm hâtun muvâcehesinde üzerine da‘vâ ve takrîr-i kelâm edip mahmiye-i mezbûre hısnı ebvâbından Edirnekapısı hâricinde vâki‘ iki tarafı mekābir-i müslimîn ve iki tarafı tarîk-i âm ile mahdûd bir bâb fevkānî oda ve iki bâb tahtânî odaları ve bir sundurma ve zât-ı eşcâr-ı müsmire ve gayr-ı müsmire bahçeyi müştemil menzilin arsası merhûm ve mağfûrun-leh Sultan Bayezid Hân -aleyhi’r-rahmetü ve’l-gufrân- vakfı olup binâsı zevcem gāibe ani’l-meclis Şerife Rahime bt. Mahmud nâm hâtunun mülkü olmağla târih-i kitâbdan bir ay mukaddem bana menzil-i mahdûd-ı mezkûrun arsasını ma‘rifet-i mütevellî ile meccânen ferâgat ve binâsını cemî‘ tevâbi‘i ile beş bin akçeye bey‘ ve teslîm edip ben dahi minvâl-i muharrer üzre iştirâ ve tesellüm ve kabûl ve kabz ve def‘-i semen edip mülk-i müşterâm olmuşiken mezbûre Âişe menzil-i mezbûra bi gayri hakkın vaz‘-ı yed edip benim tasarrufuma mâni‘a olur suâl olunup takrîri tahrîr ve menzil-i merkūmdan kasr-ı yedine tenbîh olunmak matlûbumdur dedikde gıbbe’s-suâl mezbûre Âişe cevâbında menzil-i mahdûd-ı mezkûrun binâsı merhûm Hüseyin Dede b. Abdullah’ın mülkü olmağla dokuz yüz otuz bir senesi Şa‘bâni’l-mu‘azzamı evâhirinde vakf-ı sahîh-i şer‘î ile vakf edip süknâsı evvelâ kendi nefsine ba‘dehâ sulbiye kızı Mihri ile zevci Ahmed b. Hamza nâm kimesneye ba‘dehümâ evlâdlarına ve evlâd-ı evlâdlarına ba‘de’l-inkırâz sâdât-ı kirâmdan bir recül-i sâlihe şart ve ta‘yîn edip hâlâ ben mezbûre Mihri’nin sadriye kızı Hatice’nin sadrî oğlu Mehmed’in sulbiye kızı olmağla menzil-i mahdûd-ı mezkûrda sâkine olup zabt ve tasarruf ederim deyip târih-i mezkûr ile müverraha ve târih-i mezbûrda medîne-i Hazret-i Ebâ Eyyûb-i Ensârî’de icrâ-yı ahkâm-ı şer‘iyye eden Abdullah Efendi b. Ömer imzâsıyla mümzât ve hatmi ile mahtûm vakfiye ibrâz edip mezbûr Hasan Beşe muvâcehesinde feth ve kırâat olundukda mazmûnu mezbûre Âişe’nin takrîr-i meşrûhuna mutâbık bulunmağın isre’l-istintâk mezbûr Hasan Beşe dahi menzil-i mahdûd-ı mezkûru mezbûr Hüseyin Dede’nin minvâl-i muharrer üzre evlâdından olduğunu ve mezbûr Âişe vâkıf-ı mezbûrun vech-i muharrer üzre evlâdından olduğunu bi tav‘ihî ikrâr ve i‘tirâf etmeğin alâ mûcebi ikrârihî menzil-i mezkûra müte‘allika merkūm Âişe ile bî-vech mu‘ârazadan mezbûr Hasan Beşe’yi men‘ birle mâ vaka‘a bi’t-taleb kayd şüd. Fi’l-yevmi’s-sâlis ve’l-ışrîn min Şevvâli’l-mükerrem li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Ali b. Abdullah, Hüseyin b. Ali, Hasan b. Abdullah ve gayruhüm.