|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 237 Hüküm no: 231 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaçak köle Hasan b. Abdullah’ın, Eyüp’te yakalanıp nafaka tayini
Mahmiye-i İstanbul hısnı ebvâbından Edirnekapısı hâricinde Küçük Hâslar subaşısı olan râfi‘ü’l-kitâb Hüseyin Çavuş b. Sinan nâm kimesne meclis-i şer‘-i şerîfde takrîr-i kelâm ve bast-ı merâm edip işbu orta boylu açık kaşlı gök gözlü Rûsiyyü’l-asl hâzır bi’l-meclis Hasan b. Abdullah nâm şâbb-ı emred târih-i kitâbdan bir gün mukaddem medîne-i Hazret-i Ebâ Eyyûb-i Ensârî mahallâtından Süleyman Subaşı mahallesinde sâkin Yusuf nâm kimesne yediyle abd-i âbık olmak üzre ahz olunmuşdur suâl olunup takrîri tahrîr ve mevlâsı zuhûr edinceye değin kıbel-i şer‘den kadr-i kifâye nafaka ve kisve-bahâ takdîr olunmak matlûbumdur dedikde gıbbe’s-suâl merkūm Hasan cevâbında vilâyet-i Anadolu’da kasaba-i Göynük’de sâkin Hatîb Ali Efendi’nin abd-i müşterâsı olup işbu sene Ka‘be-i mükerreme’ye gitmekle ben dahi firâr eyledim hâlâ rıkkım deyû abd-i âbık olduğunu bi tav‘ihî ikrâr etmekle hâkim-i muvakki‘-i sadr-ı kitâb tûbâ-lehû ve hüsnü me’âb hazretleri mevsûf-ı merkūm Hasan’ın mevlâsı zuhûr edinceye değin nafaka ve kisve-bahâsı için târih-i kitâbdan yevmî altışar akçe farz ve takdîr edip meblağ-ı mefrûz-ı mezkûru harc [ve] sarfa ve istidâneye ve lede’z-zafer mevlâsı üzerine rücû‘a mezbûr subaşıya izin birle mâ vaka‘a bi’t-taleb ketb olundu. Fi’l-yevmi’s-sâdis aşer min Zilka‘deti’ş-şerîfe li sene tis‘în ve elf.
Şuhûdü’l-hâl: Mustafa Halîfe b. Ali el-Müezzin, Murtaza Bey b. Bâli, Mehmed b. Eyüb, Mehmed b. Abdullah, Ali b. Abdullah, Hasan b. Abdullah.
|