|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 236 Hüküm no: 230 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hacı Durak b. Mustafa’nın, Hasan Ağa b. Mehmed Efendi’ye borcu olması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Defterî Mahmud Efendi mahallesi sâkinlerinden olup düstûr-ı mükerrem müşîr-i müfahham nâzım-ı nizâmü’l-âlem muslih-i mesâlih-i benî Âdem vezîr-i sânî müsâhib-i şehriyârî devletlü sa‘âdetlü Mustafa Paşa -yesserallâhu mâ yürîdü ve mâ yeşâ- hazretlerinin kethüdâları işbu kitâb-ı sıhhat-nisâbın sâhibi olan iftihârü’l-emâcid ve’l-ekârim câmi‘ü’l-mehâmid ve’l-mekârim Hasan Ağa b. el-merhûm Mehmed Efendi taraf-ı bâhirü’ş-şereflerinden husûs-ı âti’l-beyâna vekîl olup hasm-ı câhid-i şer‘î muvâcehesinde Ahmed Ağa b. Abdullah ve Mehmed Usta b. Ahmed şehâdetleriyle şer‘an vekâleti sâbite olan Mehmed Ağa b. Ali mahfil-i kazâda el-Hâc Durak b. Mustafa mahzarında bi’l-vekâle üzerine da‘vâ ve takrîr-i kelâm edip müvekkilim mûmâ-ileyh Hasan Ağa’nın merkūm el-Hâc Durak zimmetinde cihet-i karz-ı şer‘îden bin yedi yüz elli kıt‘a esedî guruş hakkı olup hâlâ taleb eylediğimde edâdan imtinâ‘ eder suâl olunup edâsına tenbîh olunmak bi’l-vekâle matlûbumdur dedikde gıbbe’s-suâl merkūm el-Hâc Durak cevâbında ber vech-i muharrer müvekkil-i mûmâ-ileyh Hasan Ağa’ya meblağ-ı mezkûr bin yedi yüz elli esedî guruş zimmetimde lâzımü’l-kazâ deynim vardır deyû tav‘an ikrâr ve i‘tirâf etmeğin alâ mûcebi ikrârihî meblağ-ı mezkûru müvekkil-i mûmâ-ileyh Hasan Ağa’ya edâya mersûm el-Hâc Durak’a tenbîh birle mâ vaka‘a bi’t-taleb ketb olundu. Fi’l-yevmi’s-sâdis aşer min Zilka‘deti’ş-şerîfe li sene tis‘în ve elf.
Şuhûdü’l-hâl: Umdetü’l-emâcid ve’l-e‘âlî Mehmed Efendi, Fahrü’l-eşbâh Yusuf Ağa muhassıl-ı Haleb sâbıkan, Mustafa Çelebi b. Pervâne, câmeşûy Ahmed Ağa b. ( ), Zahrü’l-akrân Ali Ağa, es-Seyyid Ali Çelebi b. Mustafa, Mustafa Çelebi b. İbrahim.
|