|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 238 Hüküm no: 233 Orijinal metin no: [34a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dimitraki v. Panayot’un emlak ve arazilerini Dimo v. Yorgo’ya satması
Vilâyet-i Rumeli’nde Kalavrita kazâsına tâbi‘ Sobotos nâm karye ahâlîsinden Dimitraki v. Panayot nâm zimmî tarafından husûs-ı âti’l-beyâna vekîl olup hasm-ı câhid-i şer‘î muvâcehesinde İstati v. Panayot ve Yorgo v. Baba İstemad nâm zimmîler şehâdetleriyle şer‘an vekâleti sâbite olan Yani v. İspilyot nâm zimmî meclis-i şer‘-i şerîfde işbu râfi‘ü’r-rakīm Dimo v. Yorgo nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilim mezbûr Dimitraki’nin silk-i mülkünde münselik olup karye-i mezbûrede vâki‘ bir tarafdan Kanalo v. Petranko nâm zimmî mülkü ve bir tarafdan İspilyot v. Mogadi nâm zimmî mülkü ve bir tarafdan vakıf menzil ve bir tarafdan tarîk-i âm ile mahdûd bir fevkānî ve iki tahtânî odaları ve anbarı ve zât-ı eşcâr-ı müsmire ve gayr-ı müsmire bahçe ve iki kıt‘a bostan yerini müştemil mülk menzilde olan nısf hisse-i şâyi‘asını ve mevâzi‘-i müteferrikada vâki‘ kırk dip dut eşcârında olan nısf hisse-i şâyi‘asını ve karye-i mezbûrede vâki‘ bir tarafı Yani Liko mülkü ve bir tarafı Dimitraki Eşkade mülkü ve iki tarafı dere ve tarîk-i âm ile mahdûd bir kıt‘a bostan yerinde olan nısf hisse-i şâyi‘asını ve yine karye-i mezbûrede vâki‘ iki tarafı Panayot v. Yani bağı ve iki tarafı dere ile mahdûd tahmînen beş çapalık bir kıt‘a mülk bağda olan nısf hisse-i şâyi‘asını cemî‘ hukūk ve merâfıkı bi safkatin vâhidetin mesfûr Dimo’ya yirmi beş kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzre iştirâ ve kabûl eyledikden sonra yine karye-i mezbûre sınırı dâhilinde mevâzi‘-i müteferrikada vâki‘ ma‘lûmü’l-hudûd ve’l-mikdâr tarlalarda olan nısf hisse-i şâyi‘asının dahi tasarrufunu ma‘rifet-i sâhib-i arz ile merkūm Dimo’ya yirmi kıt‘a esedî guruş mukābelesinde tefvîz ve ferâğ edip ol dahi ber vech-i muharrer tefevvuz ve kabûl eyleyip semen-i mezbûr ile bedel-i mezkûr ki cem‘an kırk beş guruşu mersûm Dimo yedinden bi’t-tamâm ahz ve kabz eylediğimden sonra emlâk-i merkūme ile arâzi-i mezkûrenin nısf-ı şâyi‘lerini mahallinde zabt ve tasarrufa merkūm Dimo’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer min Zilka‘deti’ş-şerîfe li sene tis‘în ve elf.
Şuhûdü’l-hâl: Hüseyin Çavuş b. Sinan, Abdüsselâm Efendi b. Nasuh, Hasan b. Abdullah, Mehmed b. Eyüb ve gayruhüm mine’l-hâzırûn.
|