.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 239
Hüküm no: 234
Orijinal metin no: [34b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mahmud b. Hasan’ın evini Hatice Hatun bt. Mustafa’ya satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Ahmed Dede mahallesinde sâkin Mahmud b. Hasan nâm kimesne meclis-i şer‘-i hatîr-i lâzımü’t-tevkīrde işbu râfi‘atü’l-kitâb Hatice Hâtun bt. Mustafa mahzarında bi tav‘ihî ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup arsasının hazret-i müşârün-ileyh evkāfına senede beş akçe mukāta‘ası olan mahalle-i mezbûrede vâki‘ bir tarafı Bîzebân Ahmed Çelebi mülkü ve bir tarafı suyolcu Hüseyin mülkü ve bir tarafı Abdullah Çelebi mülkü ve bir tarafı tarîk-i âm ile mahdûd bir tahtânî oda ve bir sofa ve bir mikdâr bahçeyi müştemil zevcem hâzıre bi’l-meclis Râbia bt. Halil nâm hâtuna hibe ve temlîk eylediği mülk menzilimi cemî‘ tevâbi‘ ve levâhıkıyla merkūme Hatice Hâtun’a beş bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mastûr beş bin akçeyi merkūme Hatice Hâtun yedinden tamâmen ahz ve kabz eyledim ba‘de’l-yevm menzil-i mezkûr mezbûre Hatice Hâtun’un mülk-i müşterâsı olmuşdur keyfe mâ yeşâ’ mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb kayd şüd. Fi’l-yevmi’s-sâmin aşer [min Zilka‘deti’ş-şerîfe li sene tis‘în ve elf.]


Şuhûdü’l-hâl: Mustafa Ağa b. Abdullah, Siyavuş b. Abdullah, es-Seyyid Ârif Çelebi b. Mustafa, Mehmed b. Şaban, Ahmed Beşe b. Hüseyin.