.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 262
Hüküm no: 271
Orijinal metin no: [39b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ali b. Hamdi’nin İbrahim b. Abdullah’a olan borcunu ödemesi

Medîne-i Hazret-i Ebâ Eyyûb -radiye anhu Rabbühü’l-Bârî- de İslâm Bey mahallesi sükkânından işbu râfi‘ü’l-kitâb İbrahim b. Abdullah meclis-i şer‘-i hatîr-i lâzımü’t-tevkīrde yine medîne-i mezbûrede Câmi‘-i Kebîr mahallesi sâkinlerinden Ali b. Hamdi nâm kimesne mahzarında üzerine da‘vâ ve takrîr-i kelâm edip mezbûr Ali zimmetinde yedimde müşterâ ve makbûz sirke semeninden bin beş yüz seksen akçe ve mezbûr Ali’nin gāib ani’l-meclis el-Hâc Mehmed Çelebi’ye bin iki yüz altmış akçe ve yine gāib ani’l-meclis çörekçi Musa Beşe’ye dahi iki yüz yetmiş dokuz akçe ki cem‘an bin beş yüz otuz dokuz akçe deyni olup meblağ-ı mezkûr bin beş yüz otuz dokuz akçeye ben emr ve kabûlü hâviye kefâlet-i sahîha-i şer‘iyye ile kefîl olmağla meblağ-ı mezkûr bin beş yüz otuz dokuz akçeyi mezbûr el-Hâc Mehmed Çelebi’ye ve çörekçi Musa Beşe’ye kefâlet-i mahkiyem hasebiyle edâ eyleyip semen-i mezbûr bin beş yüz akçe ile mezbûrân el-Hâc Mehmed Çelebi ve Musa Beşe’ye eylediğim bin beş yüz otuz dokuz akçe ki cem‘an üç bin yüz on dokuz fıddî râyic fi’l-vakt akçeden dört yüz seksen akçesini alıp meblağ-ı mezbûrdan bâkī kalan iki bin altı yüz otuz dokuz akçe hakkımı taleb eylediğimde edâdan imtinâ‘ [eder] suâl olunup edâsına tenbîh olunmak matlûbumdur dedikde gıbbe’s-suâl mezbûr Ali cevâbında vech-i muharrer üzre mezbûr İbrahim zimmetinde bin altı yüz otuz dokuz akçe vâcibü’l-edâ deyni olduğunu bi’t-tav‘ ikrâr ve i‘tirâf etmeğin alâ mûcebi ikrârihî meblağ-ı bâkī-i mezbûr iki bin altı yüz otuz dokuz akçeyi mezbûr İbrahim’e edâ ve teslîme mezkûr Ali’ye tenbîh mâ vaka‘a kayd şüd. Fi’l-yevmi’s-sâmin aşer min Zilhicceti’ş-şerîfe li sene tis‘în ve elf.


Şuhûdü’l-hâl: Mehmed b. Halil, Hüseyin b. Hasan, Ali b. Abdullah, Mehmed b. Mahmud, Dilâver b. Abdullah.