.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 263
Hüküm no: 272
Orijinal metin no: [39b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hacı İbrahim b. Ali’nin evini Şerife Fâtıma Hatun Vakfı’na istiğlâl yoluylasatması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Takyecibaşı mahallesi sâkinlerinden el-Hâc İbrahim b. Ali nâm kimesne meclis-i şer‘-i hatîr-i lâzımü’t-tevkīrde medîne-i mezbûrede vâki‘ Şerife Fâtıma Hâtun nâm sâhibetü’l-hayrın nukūd-ı mevkūfesine berât-ı âlîşân ile bi’l-fi‘l mütevellî olan işbu râfi‘ü’l-kitâb İbrahim Efendi b. Hasan mahzarında tav‘an ikrâr-ı tâm ve takrîr-i kelâm edip hâzır bi’l-meclis Ali Çelebi b. Seydî’nin emlâkinden olup mahalle-i mezbûrede vâki‘ bir tarafdan (...) Efendi b. İsmail nâm kadı mülkü ve bir tarafdan Hasan Çelebi b. Ahmed mülkü ve bir tarafdan Mülâyim nâm (...) meşrût menzil ve bir tarafdan tarîk-i âm ile mahdûd dört bâb fevkānî odaları ve (...) ve bir şehnişîn ve iki bâb tahtânî odaları ve bir kenîfi ve bi’r-i mâ ve zât-ı eşcâr-ı müsmire ve gayr-ı müsmire (...) [bahçeyi] müştemil mülk menzili bi cümleti’t-tevâbi‘ ve’l-levâhık babam mezbûr Ali Çelebi’nin izin ve rızâsıyla mezbûr İbrahim Efendi’ye doksan kıt‘a esedî guruşa bi tarîki’l-istiğlâl bey‘ ve (...) [teslîm ol dahi] vakf-ı mezkûr malıyla tarîk-i mezkûr üzre iştirâ ve tesellüm ve kabûl eyleyip semeni olan meblağ-ı mezkûr (...) guruşu mütevellî-i mezbûr yedinden tamâmen ahz ve kabz eylediğimden sonra yine mütevellî-i mezbûr menzil-i [mahdûd-ı] mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î sene-i âtiye Muharremü’l-harâmı gurresinden (...) dokuz esedî guruşdan üç sene tamâmına değin cem‘an yirmi yedi guruş (...) bana îcâr ve teslîm edip ben dahi ber vech-i muharrer istîcâr ve tesellüm ve kabûl eyledim dedikde (…) [gıbbe’t-tasdîki]’ş-şer‘î mukırr-ı mezbûr el-Hâc İbrahim’in babası mezbûr Ali Çelebi mütevellî-i mezbûr İbrahim Efendi mahzarında (...) mülküm olan menzil-i mahdûd-ı mezkûru minvâl-i muharrer üzre bi tarîki’l-istiğlâl bey‘ oğlum (...) el-Hâc İbrahim’e izin verdiğimden sonra meblağ-ı mezbûr doksan guruşa ve ücret-i merkūmeye emr ve (…) [kabûlü] [40a] hâviye kefâlet-i sahîh-i şer‘iyye ile kefîl oldum dedikde ba‘de’t-tasdîk ve’l-kabûl mâ vaka‘a bi’l-ibtigā kayd olundu. Fi’l-yevmi’l-ışrîn bin Zilhicceti’ş-şerîfe li sene tis‘în ve elf.


Şuhûdü’l-hâl: Mehmed Efendi b. Nasuh, Hasan Ağa b. Mustafa, Süleyman Çelebi b. Ali, Abdüsselâm Efendi b. Nasuh, İbrahim Efendi b. Mustafa, Ahmed Efendi b. Mustafa, Ahmed Çelebi b. Ali, İbrahim b. Mehmed.