|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 265 Hüküm no: 276 Orijinal metin no: [40a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yani v. Tanaş’ın tarlalarını Panayot v. İspilot’a satması
Fi’l-asl vilâyet-i Rumeli’nde Kalavrita kazâsına tâbi‘ Kerniye nâm karye sükkânından olup hâlâ mahmiye-i İstanbul’da Abdi Subaşı mahallesinde sâkin Yani v. Tanaş nâm zimmî meclis-i şer‘-i şerîfde işbu hâmilü’l-kitâb Panayot v. İspilot nâm [zimmî] muvâcehesinde ikrâr ve takrîr-i kelâm edip tefvîz-i âtî sudûruna değin taht-ı tasarrufumda olup karye-i mezbûre sınırı dâhilinde vâki‘ bir tarafdan Yani İlya nâm zimmî tarlası ve bir tarafdan dere ve bir tarafdan ba‘zan Zekeriya b. Hasan ve ba‘zan Bâli nâm kimesneler tarlaları ve bir tarafdan tarîk-i âm ile mahdûd otuz dip dut ağacını hâvî tahmînen dört keyl tohum istî‘âb eder iki kıt‘a tarla ve yine karye-i mezbûre sınırı dâhilinde vâki‘ bir tarafdan oluk ta‘bîr olunur hark ve bir tarafdan Nikola v. Aleksandri nâm zimmî tarlası ve bir tarafdan diğer Nikola v. Todori tarlası ve bir tarafdan İstati v. Dimitri tarlası ile mahdûd tahmînen bir keyl tohum istî‘âb eder bir kıt‘a tarlalarımın hakk-ı tasarruflarını sâhib-i arz ma‘rifetiyle merkūm Panayot’a yüz kırk kıt‘a esedî guruş bedel mukābelesinde tefvîz ve ferâğ edip ol dahi ber vech-i muharrer tefevvuz ve kabûl eyleyip bedel-i ferâğ olan meblağ-ı mezkûr yüz kırk guruşu merkūm Panayot elinden tamâmen ahz ve kabz eylediğimden sonra zikr olunan üç kıt‘a tarlaları mahallinde kabz ve tasarrufa merkūm Panayot’u taslît eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-hâmis ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Mehmed Efendi b. Mustafa, Derviş Ali Çelebi b. Veli, Mustafa Çelebi b. Mehmed, Hasan b. Abdullah, Dilâver b. Abdullah ve gayruhüm.
|