.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 266
Hüküm no: 277
Orijinal metin no: [40a-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mahmud b. Osman’ı dövenlere tâzir cezası verilmesi

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Otakçıbaşı mahallesinde sâkin işbu râfi‘ü’l-kitâb Mahmud b. Osman meclis-i şer‘-i şerîfde İbrahim Beşe b. Mehmed ve Süleyman Beşe b. Sinan ve Hüseyin b. Tokmak nâm kimesneler mahzarlarında üzerlerine da‘vâ ve takrîr-i kelâm edip târih-i kitâb gecesi kable’l-mağrib her biri sekrân oldukları hâlde mezbûr Hüseyin mezbûrân İbrahim ve Süleyman ile kapıma gelip kapımı yıkmak sadedinde olmağla ben dahi taşra çıkdığımda mezbûr Hüseyin mezbûrân i‘âneleriyle bi gayri hakkın yakama yapışıp ve beni darb eyledi suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr ve isre’l-talebi’l-beyyine yine medîne-i mezbûrede Fethi Çelebi mahallesi sükkânından Ahmed Efendi b. Receb el-Müezzin ve Mustafa b. Hakkı ve Hüseyin b. Osman nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ mezbûrûn İbrahim Beşe ve Süleyman Beşe ve Hüseyin Beşe vakt-i mezbûrede her biri sekrânen mezbûr Mahmud’un menzili kapısına varıp kapısını yıkmak sadedinde olduklarında ol dahi taşra çıkmağla mezbûrân İbrahim Beşe ve Süleyman Beşe [40b] i‘âneleriyle mezbûr Hüseyin Beşe ber vech-i muharrer müdde‘î-i mezbûr Mahmud’un yakasına yapışıp darb eder iken gördük bu husûsa bu vech üzre şâhidleriz ve şehâdet dahi ederiz deyû her biri edâ-i şehâdet-i şer‘iyye eylelediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ta‘zîre ba‘de’l-hükm ve’t-tenbîh mâ vaka‘a bi’l-ibtigā ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe li sene tis‘în ve elf.


Şuhûdü’l-hâl: Mehmed Efendi b. İbrahim, Ali Çelebi b. Mustafa, Mehmed b. Bayezid, Hasan b. Mustafa ve gayruhüm.