|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 289 Hüküm no: 313 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Ağa b. Yusuf Efendi’nin evlerini vakf etmesi
Hamd ve sipâs ve şükr-i bî-kıyâs ol mâlikü’l-mülk ve’l-melekût ve Rabbü’l-izzeti ve’l-ceberût, hâlik-i bî-misâl ve râzık-ı bî-zevâl hazretlerine olsun ki kâinâtı nizâm-ı bedî‘ üzre ibdâ‘ ve âmme-i masnû‘âtı üslûb-ı menî‘ üzre ihtirâ‘ eyledi -celle celâlühû ve âmme nevâlühû ve lâilâhe gayruhu- ve hediyye-i tahiyyât-ı gayr-ı ma‘dûd ve tuhef-i teslîmât-ı gayr-ı mahdûd hazret-i risâlet-penâh-ı nübüvvet-destgâh efdal-i beşer, şefî‘-i rûz-ı mahşer-i pîşvâ-yı enbiyâ ve mürselîn, muktedâ-i evvelîn ve âhirîn, resûl-i Rabbü’l-âlemîn, hâtime-i silsileti’l-mürselîn Ahmed-i Müctebâ-yı Mustafa -sallallâhu aleyhi ve sellem- bi adedi men samete ve tekelleme hazretlerinin ravza-i mübârekelerine olsun ki ümmet-i ûli’n-nehmetlerini sırât-ı müstakīme delâlet eyledi ve âl ü evlâd-ı kirâm ve ashâb ve ahfâd-ı izâma ki her biri necm-i burc-ı felek-i dîn ve kevkeb-i evc-i Âsumân-ı yakīn olup âmme-i ibâdı sırât-ı müstakīme hâdî ve savâbı dârü’n-ni‘ama münâdî ettiler -rıdvânullâhi te‘âlâ aleyhim ecma‘în- ve alâ men tebi‘ahüm ilâ yevmi’d-dîn, ammâ ba‘d işbu vesîka-i celîlü’ş-şân ve cerîde-i bedâyi‘ü’l-unvânın tahrîr ve inşâsına bâ‘is ü bâdî ve satr u imlâsına sebeb-i âdî oldur ki belde-i mübâreke-i Hâlidiyye ve buk‘a-i müteberreke-i Ensârîyye medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de ve Bağlar deresi demekle ma‘rûf mevzi‘de Ahmed Dede mahallesi sâkinlerinden sâhibü’l-hayrât ve’l-hasenât ve tâlibü’l-ucûr ve’s-sadakāt, iftihârü’l-emâcid ve’l-ekârim câmi‘ü’l-mehâmid ve’l-mekârim Ahmed Ağa b. Yusuf Efendi mebde-i fıtratdan müntehâ-yı menziletini tefekkür ve küllî şey’in hâlikün illâ vecheh, mazmûnunu tedebbür edip bi’l-âhare infisâm-ı âcâl ile bu dâr-ı gurûrdan irtihâl mukarrer idiğini itkān ve mâ indeküm yenfedü ve mâ indallâhi bâkin, kavl-i şerîfini ve dahi izâ mâte ibnü âdeme inkata‘a amelühû illâ an selâsin ilmin yüntefe‘u-bihî ve veledin sâlihin yed‘û-lehû ve sadakatin câriyetin, kavl-i münîfini iz‘ân eyleyip hâl-i âfiyetinde li yevmi’l-mî‘âd tezevvüd-i zâd-ı kesîrü’l-imdâd ve li yevmi’t-tenâd, avâid-i mütekâsire i‘dâd edip ber mûceb, len tenâlü’l-birre hattâ tünfikū mimmâ tuhibbûne, vech-i câ’î üzre vücûh-ı berre etyab-ı malını bezle âzim ve enfes-i mâlını vakfa câzim olup kâffe-i akārîr ve tasarrufâtı sahîha ve câize ve âmme-i tekārîr ve teberru‘âtı nâfize olduğu hâlde meclis-i şer‘-i şerîf-i Nebevî’de, vakf-ı âti’t-tafsîle mütevellî nasb ve ta‘yîn eylediği fahrü’l-eşbâh İbrahim Çelebi b. Mehmed nâm kimesne mahzarında bi’t-tav‘i’s-sâf ikrâr-ı sahîh-i şer‘î ve i‘tirâf-ı sarîh-i mer‘î kılıp vakf-ı câ’i’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Küçükköy demekle ma‘rûf karyeye giden tarîk-i âmme ve bir tarafdan Haremeyn-i şerîfeyn halîfesi menzili önünden kaldırıma giden tarîk-i âma ve bir tarafdan Hazret-i Ebâ Eyyûb-i Ensârî evkāfı’ndan olup ammim Hasan Ağa’nın tasarrufunda olan tarla ve bir tarafdan Bıyıklı oğlu bağı demekle ma‘rûf hâlâ kendi taht-ı tasarrufumda olan mülk bağıma müntehî ve mahdûd muhavvateyni muhtevî olup muhavvata-i hâriciyyede dört bâb fevkānî odaları ve bir camlı köşk ve bir sofa ve kenîf ve altında bir oda ve bir kiler ve bir sofa ve bir sagīr bahçe ve beş göz anbar ve bir at ahırı ve bir öküz ahırı ve üstünde bir bâb oda ve bir samanlık ve iki hayât ve muhavvata-i dâhiliyyede beş bâb fevkānî odaları ve bir cihânnümâ ve kenîf ve iki halvetli bir hamam ve bir camekân ve bir bâb tahtânî oda ve bir kiler ve bir matbah ve bir sagīr bahçe ve hâriciyye ve dâhiliyyenin etrâfında zât eşcâr-ı müsmire ve gayr-ı müsmire bahçeyi ve beş aded bi’r-i mâyı müştemil mülk menzilimi cemî‘ tevâbi‘ ve levâhıkıyla ve medîne-i mezbûre tevâbi‘inden kasaba-i Hasköy’de Kiremitçi Ahmed Çelebi mahallesinde vâki‘ bir tarafı Bâzirgân Evi demekle ma‘rûf menzil ve bir tarafdan Ömer Bey vakfı olan menzil ve bir tarafı Abdi Bey mülkü ve bir tarafı tarîk-i âm ile mahdûd iki bâb fevkānî ve bir tahtânî odaları ve matbah ve zât eşcâr-ı müsmire ve gayr-ı müsmire bahçeyi müştemil mülk menzilimi dahi cemî‘ tevâbi‘iyle hasbeten lillâhi’s-samed vakf-ı sahîh-i müebbed ile vakf ve haps edip şöyle şart ve ta‘yîn eyledim ki zikr olunan Ahmed Dede mahallesinde vâki‘ menzil-i mahdûd-ı mezkûrda vâlidem Rahime Hâtun bt. Abdülmennân mâdâm ki libâs-ı hayâtı lâbis ola yevmî onar akçe icâre ile sâkine ola ve ba‘de vefâtihimâ kendim dahi icâre-i merkūme ile sâkin olam ve ba‘de vefâtî evlâdım ve evlâd-ı evlâdım ve evlâd-ı evlâd-ı evlâdım batnen ba‘de batnin ve karnen isre karnin ber vech-i muharrer sâkin olalar ve icâre-i mezkûreden hâsıl olan meblağı mütevellî-i mezbûr ahz ve kabz edip ta‘mîr ve termîmine harc ve sarf eyleye ve ba‘de inkırâzi’l-kül zikri âtî eczâ-i şerîfe vakfına zam oluna ve sâlifü’l-beyân Kiremitçi Ahmed Çelebi mahallesinde vâki‘ menzil-i mahdûd-ı mezkûr dahi kezâlik yed-i mütevellî-i mezkûre ve icâre-i mu‘accele ve müeccele ile hasbe’l-mu‘tâd îcâr olunup hâsıl olan icâresinden yevmî ikişer akçe vazîfe ile müstahıkkīnden beş nefer kimesneler mahmiye-i İstanbul’da vâki‘ merhûm ve mağfûrun-leh Ebü’l-feth Sultan Mehmed Hân-ı Gāzi câmi‘-i şerîfi’nde vakt-i zuhrda Kur’ân-ı azîm ve Furkān-ı kerîm’den beş cüz’-i şerîf tilâvet edip her altı günde bir hatm-i şerîf eyleyip sevâbını server-i kâinât mefhar-i mevcûdât hazret-i Muhammedi’l-Mustafa -sallallâhu te‘âlâ aleyhi ve sellem- hazretlerinin rûh-ı mutahharlarına ve dahi çehâr-yâr-ı güzîn -rıdvânullâhi te‘âlâ aleyhim ecma‘în- hazretlerinin ervâh-ı tayyibelerine [46a] ve sâir üzerimizde hakkı olan kimesnelerin ervâhına hibe ve ihdâ edeler ve mezbûr İbrahim Çelebi madâmki hayâtda ola vakf-ı mezkûra mütevellî olup ba‘de vefâtihî evlâdım ve evlâd-ı evlâdım ve evlâd-ı evlâd-ı evlâdım vakf-ı mezbûra mütevellî olalar ve ba‘de’l-inkırâz vâlidemin evkāfına mütevellî olanlar benim vakf-ı mezkûruma mütevellî olup vazîfe-i merkūmeye mutasarrıf ola ve vakf-ı mezkûrun tebdîl ve tağyîri merreten ba‘de uhrâ yedimde ola ve mürûr-ı eyyâm ile şerâit-i vakf-ı mezkûr müte‘azzir olursa mutlaka fukarâ-yı müslimîne sarf oluna deyû fâriğan ani’ş-şevâgil menzilân-ı merkūmân mütevellî-i mezbûra teslîm ol dahi kabz ve tesellüm edip sâir mütevellîler evkāfına tasarruf eyledikleri gibi tasarruf eyledi dedikde gıbbe’t-tasdîki’ş-şer‘î vâkıf-ı mezbûr semt-i vifâkdan cânib-i şikāka âzim olup vakf-ı akār imâm-ı hümâm muktedâ-i eimme-i fihâm Ebû Hanife rahmetullâhi’l-allâm mezheb-i şerîflerinde eğer ki sahîhdir, lâkin sıhhat müstelzim-i lüzûm olmadığından mâ‘adâ vâkıf nef‘-i vakfı kendiye şartı ile kezâlik İmâm-ı Rabbânî Muhammed b. el-Hasan eş-Şeybânî ve İmâm Hilâl b. Yahya el-Basrî mezheb-i şerîflerinde vakıf bâtıl olmağla benim için vakf-ı mezbûrdan rücû‘ emr-i meşrû‘dur deyû istirdâd-ı mülk edicek mütevellî-i mezkûr mütevekkilen ale’llâhi’ş-şekûr cevâb-ı bâ savâba mütesaddî olup fi’l-hakīka hâl zikr olunan minvâl üzredir, lâkin imâm-ı hümâm muktedâ-i enâm İmâm Ebû Yusuf Yakub b. İbrahim katında vâkıf nef‘-i vakfı kendiye şartı ile vakf-ı mezbûr sahîh ve lâzımdır deyû redden imtinâ‘ ve bu vechile def‘ eyleyip her biri işbu kitâb-ı sıhhat-nisâbı muvakki‘ olan hâkim-i fâsıl-ı ahkâm huzûrlarında müterâfi‘ân olduklarında hâkim-i mûmâ-ileyh ve dâmetü’l-ahkâm nâfizeten beyne yedeyye dahi tarafeynin kelâmını ısgā ve taraf-ı vakfı tercîhi ahrâ görüp ve mes’ûl fi’l-hükm olduğu hâlde İmâm Ebû Yusuf mezhebi üzre vakf-ı mezbûrun sıhhat ve lüzûmuna hükm-i sahîh-i şer‘î ve kazâ-i sarîh-i mer‘î kılıp min ba‘d vakf-ı merkūm bi’l-hükmi’l-merkūm sahîh ve lâzım olup nakz ve naks ve tahvîl ve tegayyürü ve tebdîli mümteni‘ü’l-ihtimâl oldu fe-men beddelehû ba‘de mâ semi‘ahû fe-innemâ ismuhû ale’l-lezîne yübeddilûne innallâhe semî‘un alîm ve ecrü’l-vâkıfı ale’l-hayyi’l-cevâdi’l-kerîm, Cerâ zâlik ve hurrire fi’l-yevmi’l-hâmis aşer min Zilhicceti’ş-şerîfe li sene tis‘în ve elf.
Şuhûdü’l-hâl: Yusuf Efendi b. Hüseyin, Ahmed Bey b. el-merhûm Mehmed Bey el-ma‘rûf bi Şahbaz Paşazâde, Hasan Ağa b. Hüseyin, Ali Efendi Kâtib-i silahdâr, Ahmed Efendi sâkin-i Kırkçeşme, Mustafa Ağa ve Ebûbekir Ağa ibney Hasan Ağa, Abdülhâlik Efendi imâm-ı Mi‘mâr Sinan, Abdülganî Çelebi Abdurrahman Çelebi b. Hüseyin, Ali Efendi b. Süleyman, Mustafa Bey b. İsmail, Es-Seyyid Nureddin ve es-Seyyid Sadeddin b. Allâme, Hasan Çelebi b. Müstedâm. Temme’l-kelâm, fî hâze’l-makām, harrerehü’l-fakīr ileyhi te‘âlâ Mehmed el-müvellâ hilâfeten sâbıkan bi medîne-i Ebâ Eyyûb el-Ensârî -radiye anhu Rabbühü’l-Bârî- -ufiye anh- [mühür]
|