.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 288
Hüküm no: 312
Orijinal metin no: [45a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Çelebi b. Mustafa’nın evini Ahmed Ağa b. Ali Ağa’ya satması

Mahrûse-i Galata’da el-Hâc A‘mâ mahallesi sâkinlerinden Mehmed Çelebi b. Mustafa nâm kimesne meclis-i şer‘-i şerîf-i enverde işbu râfi‘ü’l-kitâb fahrü’l-eşbâh Ahmed Ağa b. el-merhûm Ali Ağa el-ma‘rûf bi Kaftânîzâde mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup medîne-i Hazret-i Ebâ Eyyûb-i Ensârî’de Kasımpaşa mahallesinde vâki‘ bir tarafdan Ali Çelebi mülkü ve bir tarafdan Ormanzâde tasarrufunda olan vakıf menzil ve bir tarafdan mezbûr Ahmed Ağa tasarrufunda olan vakıf menzil ve bir tarafdan ba‘zan ekmekçi fırını ve ba‘zan tarîk-i âm ile mahdûd iki fevkānî ve iki tahtânî odaları ve matbah ve kileri ve bi’r-i mâ ve bahçeyi müştemil mülk menzilimi cemî‘ tevâbi‘ ve levâhıkı ve âmme-i hukūk ve merâfıkı ile mezbûr Ahmed Ağa’ya altı yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr altı yüz guruşu mûmâ-ileyh Ahmed Ağa yedinden tamâmen ahz ve kabz eyledim ba‘de’l-yevm menzil-i mahdûd-ı mezkûr mezbûr Ahmed Ağa’nın mülk-i müşterâsı olmuşdur keyfe mâ yeşâ’ ve haysü mâ yahtâr mutasarrıf olsun dedikde gıbbe’t-tasdîki’ş-şer‘î mâ cerâ bi’l-ibtigā kayd şüd. Fi’l-yevmi’l-âşir min Muharremi’l-harâm li sene ihdâ ve tis‘în ve elf.


Şuhûdü’l-hâl: Mehmed Efendi b. Davud, Mustafa Ağa b. Abdurrahman, Ömer Efendi b. İvaz, Süleyman Ağa b. Halil, Mustafa Çelebi b. Ömer, Mustafa b. Mehmed, İbrahim Ağa b. tâbi‘-i Ali Ağa, el-Hâc Ahmed b. Abdullah, Çorbacızâde Abdullah Çelebi, Hasan b. Abdullah, Mehmed b. Eyüb ve gayruhüm.