.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 299
Hüküm no: 327
Orijinal metin no: [48a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yorgi v. Kiryazi’nin bağını Tano v. Milo’ya satması

Vilâyet-i Rumeli’nde Göllükesri kazâsına tâbi‘ Mavrova nâm karye ahâlîsinden Yorgi v. Kiryazi nâm zimmî meclis-i şer‘-i hatîr-i lâzımü’t-tevkīrde işbu râfi‘ü’r-rakīm Tano v. Milo nâm zimmî muvâcehesinde tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve zabt-ı tasarrufumda olup karye-i mezbûrede vâki‘ bir tarafdan İstefani Yani bağı ve bir tarafı Koçu Tolko v. Kiro bağı ve iki tarafı tarîk-i âm ile mahdûd tahmînen altı dönüm bir kıt‘a mülk bağımın nısf şâyi‘ini cemî‘ tevâbi‘ ve levâhıkı ile merkūm Tano’ya elli yedi kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip ol dahi ber vech-i muharrer iştirâ ve kabûl eyleyip semeni olan meblağ-ı mezkûr elli yedi guruşu yine bâğ semeninden mesfûr Tano’ya zimmetimde lâzımü’l-edâ deynim olan elli yedi guruşa takās edip ol dahi mukāssa eyledikden sonra zikr olunan nısf bağı mahallinde zabt ve tasarrufa mersûm Tano’yu taslît eyledim min ba‘d keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min Saferi’l-hayr li sene ihdâ ve tis‘în ve elf.


Şuhûdü’l-hâl: Hüseyin b. Ali, Mehmed b. Eyüb, Hasan b. Abdullah, Mehmed b. Mahmud ve Todori [v.] Sifo, Vitor [v.] Viko, Niko [v.] İstiko, Vilho Todori [v.] Yuvan, Malko [v.] Kiryako, Manora [v.] Dimitri ve gayruhüm.