|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 298 Hüküm no: 326 Orijinal metin no: [47b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hasan Beşe b. Mehmed’in mülk evine, Âişe bt. Mehmed’in kendi tasarrufundaki zaviyeye ait olduğu gerekçesiyle olan müdahalesinin men‘i
Mahmiye-i İstanbul’da Kovacıdede mahallesi sükkânından işbu râfi‘ü’l-kitâb Hasan Beşe b. Mehmed nâm kimesne mahfil-i kazâya gelip takrîr-i kelâm ve ta‘bîr ani’l-merâm edip zevce-i menkûham olup bundan akdem fevt olan Şerife Rahime bt. Mahmud nâm müteveffât hâl-i hayâtında târih-i kitâbdan beş ay mukaddem mahmiye-i mezkûre hısnı ebvâbından Edirnekapısı hâricinde vâki‘ merhûm Hüseyin Dede zâviyesi kurbunda üç tarafı mekābir-i müslimîn ve bir tarafı tarîk-i âm ile mahdûd bir bâb fevkānî ve iki bâb tahtânî odaları ve sundurmayı ve eşcâr-ı müsmire ve gayr-ı müsmire ve bir mikdâr bahçe ve kenîfi müştemil olup arsasının merhûm ve mağfûrun-leh Sultan Bayezid Hân-ı Velî evkāfı’na senede yedi akçe mukāta‘ası ve ebniyesi mülkü olan menzilini beş bin akçeye bâtten bey‘ ve teslîm ve arsasını dahi ma‘rifet-i mütevellî evkāf-ı mezkûre ile [48a] meccânen tefvîz ve fâriğa olup ben dahi ber vech-i muharrer iştirâ ve tesellüm ve tefevvuz ve kabûl ve huzûr-ı müslimînde def‘-i semen etmişidim hâlâ zâviye-i mezkûreye mutasarrıfe ber mûceb-i şart-ı vâkıf mutasarrıfe olan gāibe ani’l-meclis Âişe bt. Mehmed nâm hâtun menzil-i mezkûru tasarrufuma mâni‘a olur. Kıbel-i şer‘-i hatîrden üzerine varılıp ba‘de’l-keşf ve’n-nazar menzil-i merkūm zâviye-i merkūmeden müfrez olduğu mu‘âyene ve müşâhede olunmak matlûbumdur dedikde savb-ı şer‘-i münîrden mevlânâ Mehmed Efendi b. Nasuh irsâl olunup ol dahi zeyl-i kitâbda muharrerü’l-esâmî müslimîn ile menzil-i mezkûra varıp keşf ve nazar eylelediklerinde fi’l-hakīka menzil-i mahdûd-ı merkūm ile zâviye-i mezkûrenin beyninde tahta havlu olup zâviye-i merkūmeden müfrez olduğunu mu‘âyene ve müşâhede ettiklerinde vâki‘ hâli mevlânâ-yı mezbûr mahallinde tahrîr ba‘de ma‘an irsâl olunan Ramazan Çelebi b. Mustafa ve Hüseyin b. Ali ile meclis-i şer‘a gelip alâ vukū‘ihi inhâ ve takrîr etmeleriyle mâ vaka‘a bi’t-taleb ketb olundu. Fi’l-yevmi’l-hâmis min Saferi’l-hayr li sene ihdâ ve tis‘în ve elf.
Şuhûdü’l-hâl: El-Hâc Yusuf b. Abdullah, Ömer Beşe b. Abdülmennân, İbrahim b. Mehmed, Hüseyin Çelebi b. Ali, Köse Yusuf [b.] Abdullah, Ramazan b. Mustafa ve gayruhüm.
|