.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 300
Hüküm no: 329
Orijinal metin no: [48a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Çelebi b. Abdülkerim’in evini istiğlâl yoluylasatması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Çavuş Kasım mahallesi sükkânından fahrü’l-eşbâh matlabî Ahmed Çelebi b. Abdülkerim meclis-i şer‘-i hatîr-i lâzımü’t-tevkīrde hammâmî Hasan Çelebi nâm müteveffânın sulbî sagīr oğlu Abdülkādir’in tesviye-i umûruna kıbel-i şer‘-i münîrden mansûb bir vasîsi olan işbu râfi‘ü’l-kitâb Mehmed Çelebi b. Mustafa nâm kimesne mahzarında tav‘an ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan mahalle-i mezbûre imâmına meşrûta menzil ve bir tarafdan tarîk-i âm ve iki tarafdan yine benim âhar mülküm ile mahdûd menzilimi cemî‘ tevâbi‘ ve levâhıkı ile vasiyy-i mezbûr Mehmed Çelebi’ye bi tarîki’l-istiğlâl iki yüz kıt‘a esedî guruşa bey‘ ve teslîm ol dahi ber vech-i muharrer sagīr-i mezbûr malıyla merkūm üzre iştirâ tesellüm ve kabûl eyleyip semeni olan meblağ-ı mezkûr iki yüz guruşu vasiyy-i mezbûr yedinden bi’t-tamâm ve’l-kemâl ahz ve kabz eylediğimden sonra yine vasiyy-i mezbûr menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi şehr-i Rebî‘ulâhiri gurresinden her senesi kırkar esedî guruşa ücret ile bana îcâr ve teslîm ben dahi minvâl-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ min Saferi’l-muzaffer li sene ihdâ ve tis‘în ve elf.


Şuhûdü’l-hâl: Ali Çelebi b. Osman, Ahmed Çelebi b. Abdullah, Hüseyin Çelebi b. Mehmed, Mustafa Çelebi b. Mehmed ve gayruhüm.