|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 300 Hüküm no: 330 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hüseyin Bey b. Hızır’ın menzilinin yarı hissesini Ümmühani bt. Davud’a satması
Medîne-i Hazret-i Eyyûb-i Ensârî -radiye anhu Rabbühü’l-Bârî-’de Baba Haydar mahallesinde sâkin Hüseyin Bey b. Hızır meclis-i şer‘-i şerîfde işbu bâ‘isetü’l-vesîka Ümmühâni bt. Davud nâm hâtun muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Efrenc Mehmed b. Abdullah mülkü ve bir tarafdan İsmail Ağa ve Mehmed Ağa mülkleri ve bir tarafdan ba‘zan Mustafa Çavuş b. Receb tasarrufunda olan vakıf menzil ve ba‘zan Bostânî Mehmed mülkü ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve bir sagīr odayı ve bir tahta-pûş ve mezbûr Bostânî Mehmed ile müşterek bi’r-i mâ ve havluyu müştemil menzilde olan nısf hisse-i şâyi‘amı mezbûr Ümmühâni Hâtun’a dört bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr dört bin akçeyi mezbûre Ümmühâni Hâtun yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’z-zikrin nısf menzil-i mezbûr merkūme Ümmühâni Hâtun’un mülk-i müşterâsıdır keyfe mâ yeşâ’ mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Saferi’l-hayr li sene ihdâ ve tis‘în ve elf.
Şuhûdü’l-hâl: İsmail b. Mustafa, Mehmed b. Abdullah, Mehmed Ağa b. Receb, Mehmed b. Eyüb, Mehmed b. Mahmud, ve gayruhüm.
|