|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 307 Hüküm no: 341 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ölü bulunan Mehmed b. Abdullah’ın cesedinin muayene edilmesi
Bi’l-fi‘l hâssa su nâzırı olan umdetü’l-emâsil ve’l-akrân Mehmed Ağa b. Abdülmennân tarafından Havâss-ı Aliyye kazâsında vâki‘ merhûm ve mağfûrun-leh Sultan Selim Hân hazretleri binâ buyurdukları su yollarına vakf ettikleri on iki aded kurânın subaşısı olan işbu râfi‘ü’l-kitâb Ahmed Bey b. Mustafa nâm kimesne ile zikri âtî maktûlün er karındaşı Süleyman b. Abdullah meclis-i şer‘-i şerîfe gelip her biri takrîr-i kelâm ve ta‘bîr ani’l-merâm edip târih-i kitâbdan beş gün mukaddem kurâ-yı mezkûreden Çiftalan ve Ayvad nâm karyeler beyninde Kestanederesi demekle ma‘rûf derede sâlifü’z-zikr Çiftalan karyesi sükkânından Mehmed b. Abdullah nâm kimesne köm[ü]r yakmak için ağaç kat‘ ederken hâlâ maktûl bulunmağın keşf olunup defn olunmak bâbında vârid olan buyruldu-yı şerîf mûcebince kıbel-i şer‘den üzerine varılıp ba‘de’n-nazar vâki‘ hâl ketb ve terkīm olunmak matlûbumuzdur deyû yedlerinde olan fermân-ı şerîfi ibrâz eylelediklerinde imtisâlen-leh savb-ı şer‘-i hatîrden mevlânâ Mehmed Efendi b. Ahmed irsâl olunup ol dahi zeyl-i vesîkada muharrerü’l-esâmî müslimîn ile maktûl-i mezbûrun üzerine varıp keşf ve nazar eylelediklerinde başında bir iki yerde balta darbı olduğundan mâ‘adâ zebh olunmuş bulunduğunu mu‘âyene ve müşâhede eylelediklerinde husûs-ı mezkûru mevlânâ-yı mezbûr mahallinde tahrîr ba‘dehû ma‘an irsâl olunan Ali [b.] Abdullah ile meclis-i şer‘a gelip alâ vukū‘ihi inhâ ve takrîr etmeğin mâ cerâ bi’t-taleb ketb olundu. Fi’l-yevmi’l-hâmis aşer min Saferi’l-hayr li sene ihdâ ve tis‘în ve elf.
Şuhûdü’l-hâl: İbrahim b. Abdullah, Hüseyin b. Ali, Osman b. Mustafa, Osman Ağa b. Abdullah, Ömer Beşe b. Derviş, Ali b. Sinan el-İmâm, İbrahim b. Mustafa, Osman b. Mustafa ve gayruhüm.
|