|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 307 Hüküm no: 340 Orijinal metin no: [49b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Lisaro bt. Totoş ve eşi Kostantin v. Dimitri’nin mülk menzillerini Kosta v. Rado’ya satmaları
Havâss-ı Aliyye kazâsına tâbi‘ Avasya nâm karye sükkânından kendi tarafından asâleten ve zevcesi Lisaro bt. Totoş nâm nasrâniyye tarafından bey‘-i âti’l-beyânı ikrâra vekîl olup hasm-ı câhid muvâcehesinde İskerlet v. Riga ve Todori v. Panayot nâm zimmîler şehâdetleri ile şer‘an vekâleti sâbite olan Kostantin v. Dimitri nâm zimmî bi’l-asâle ve bi’l-vekâle meclis-i şer‘-i şerîfde işbu bâ‘isü’r-rakīm Kosta v. Rado nâm zimmî muvâcehesinde ikrâr ve takrîr-i kelâm edip ale’l-iştirâki’s-seviy silk-i mülk-i sahîhimde münselik olup karye-i mezbûrede vâki‘ bir tarafı İstamo nâm zimmî mülkü ve bir tarafı İskerlet nâm zimmî mülkü ve bir tarafı Totoş nâm ve bir tarafı tarîk-i âm ile mahdûd bir bâb fevkānî sundurma ve bir mikdâr havluyu müştemil mülk menzilimizi cemî‘ tevâbi‘ ve levâhıkı ile mezbûr Kosta’ya elli beş esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr elli beş esedî guruşu bi’l-asâle ve bi’l-vekâle mezbûr Kosta yedinden bi’t-tamâm ahz ve kabz eyledik ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim kalmadı müşterî-i mezbûr Kosta’nın mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene ihdâ ve tis‘în ve elf.
Şuhûdü’l-hâl: Es-Sâbikūn.
|