Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 368 Hüküm no: 421 Orijinal metin no: [58b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Hristo’nun Luna karyesinden olduğu ve cizyesini köy halkıyla beraber verdiğinin tespiti Vilâyet-i Rumeli’nde Delvine kazâsına tâbi‘ Luna nâm karye ahâlîsinden olup kendi tarafından asâleten ve sâir mahsûrü’l-esâmî karye-i mezbûre ahâlîsi taraflarından husûs-ı âti’l-beyâna vekîl-i müseccelleri olan Pasko nâm zimmî vekâleten meclis-i şer‘-i hatîr-i lâzımü’t-tevkīrde Kiro v. Hristo nâm zimmî muvâcehesinde üzerine da‘vâ ve takrîr-i kelâm edip mezbûr Kiro ve karye-i mezbûre ahâlîsinden olup işbu bin yetmiş yedi senesinde üzerine edâsı lâzım gelen dört yüz kırk akçe cizyesini ben karye-i mezbûre ahâlîsi taraflarından cem‘a vekîl olmağla hâlâ merkūmûndan taleb ederim suâl olunsun dedikde, gıbbe’s-suâl mezbûr Kiro vech-i muharrer üzre karye-i mezbûre ahâlîsinden olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda nefs-i Delvine kasabası sükkânından Halil b. Kamer nâm kimesne ile kazâ-i mezbûra tâbi‘ Fenek nâm karye sükkânından Dimo v. Yorgo nâm zimmî li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Kiro v. Hristo kadîmî karye-i mezbûre ahâlîsinden olup bu âna gelince beher sene üzerine edâsı lâzım gelen cizyesini karye-i mezbûre ahâlîsi ile ma‘an edâ edegelmişdir, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâlis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Hasan Çelebi [b.] Mehmed, İbrahim Çelebi b. Mehmed, Şükrullah b. Mustafa.