Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 133 Hüküm no: 157 Orijinal metin no: [36a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakallıoğlu İstorinos’un yarım hisse evini Panayot zimmiye sattığı Medîne-i Üsküdar’a muzâfe Adalar nâhiyesine tâbi‘ Ada-i kebîr karyesinde mutavattın Sakallıoğlu İstorinos v. Yani zimmî tarafından ber-vech-i âti’l-beyanda vekîl olduğu Kayaoğlu Kostandi v. Yorgaki ve Malamata v. Yamandi zimmîler şehâdetleriyle sâbitü’l-vekâlesi Tafani v. Togodoş zimmî meclis-i şer‘-i hatîrde işbu râfi‘ü’r-rakīm Kebab Panayot v. Todori zimmî muvâcehesinde bi’l-vekâle ikrâr ve takrîr-i kelâm edüp akd-i âti’z-zikrin sudûruna değin müvekkilim merkūmun yedinde mülkü ve hakkı olup karye-i mezbûrede vâki‘ iki tarafı benim menzilim ve mahzenim ve bir tarafı Vasil zimmî virânesi ve iki tarafı sâhil-i bahr ve tarîk-i hâs ile mahdûd fevkānî iki bâb oda ve bir sundurma ve bir matbâh ve kenîf ve tahtında bir bâb mahzen ve avluyu müştemil mülk menzilinin nısf-ı şâyi‘ini tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile müşterî-i mezbûra iki yüz guruşa bey‘ u teslîm ve temlîk edüp ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr iki yüz guruşun mütâlebesine ve menzil-i mezkûrun gabn ü tağrîrine müte‘allıka âmme-i da‘vâdan müvekkilim müşterî-i mezbûr Panayot zimmînin zimmetini ibrâ-i âmm-ı kātı‘ü’n-nizâ‘la ibrâ ve iskāt edüp fîmâ-ba‘d mârrü’z-zikr menzilin nısf-ı şâyi‘inde vechen mine’l-vücûh ve sebeben mine’l-esbâb müvekkilim merkūmun kat‘â ve kātıbeten [alâka] ve medhali kalmayup müşterî-i merkūm Kebab Panayot zimmînin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâlis ışrîn Recebi’l-ferd li-sene tis‘a ve seb‘în ve mi’ete ve elf. Şuhûdü’l-hâl: Kayseriyeli Mehmed Ağa, Ali Ağa b. Süleyman Ağa, Ahmed Efendi, Çolak Ali Beşe b. Hüseyin, Mehmed Usta b. Abdullah ve gayruhum. Manolaki v. Dimitraki, Malamata v. Yamandi, Yamandaki v. Dülger Panayot, Panayotaki v. Tanaş, Aci Dimitri v. Yani, Berber Yasef v. Yuvan, Şişman Andon, Safolu v. Yorgaki.