Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 134 Hüküm no: 158 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahr-ı siyah canibine gönderilecek donanma-i hümayunun takviyesi amacıyla yeni inşa edilecek gemiler için gerekli olan kerestenin acil olarak kesilip naklettirilmesi İftihârü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti melik iftihâr bi’l-fi‘il Hâssa Bostancıbaşı ( ) -dâme mecdühû- ve mefâhirü’l-kuzât ve’l-hükkâm me‘âdinü’l[fezâil] ve’l-ekârim Kartal ve Gekbûze Voyvodası ve Şile ve Akâbâd ve Taşköprü kazâ ve nâhiyelerinin kādıları ve nâibleri -zîde fazluhum- ve mefâhirü’l-emâsil ve’l-akrân a‘yân ve iş erleri -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki işbu sene-i bâhirü’l-meymenette evvel-bahâr-ı huceste âsârında a‘dâ-yı dînden ahz ü intikām ve sâr içün Bahr-ı siyâh cânibine külliyetli donanma-i hümâyûnum kalyonları ve ince donanma-i hümâyûnum sefâini tertîb ve irsâli mühim ve muktezî olmağla gerek tersâne-i âmiremde mevcûd olan donanma-i hümâyûnum kalyonları ve ince donanma-i hümâyûnum sefâini ve gerek bundan mukaddem müceddeden inşâlarına mübâşeret olunan kalyonları ve ince donanma-i hümâyûnum sefâininden mâ‘adâ bu def‘a dahi tersâne-i âmirem sahasında hâlâ tersâne-i âmirem emîni el-Hâc Yusuf -dâme mecdühû- ma‘rifetiyle ucâleten ve müsâra‘aten yirmi kıt‘a firkate sefâini inşâsına irâde-i seniyye-i mülûkânem ta‘alluk etmekle zikr olunan firkate sefînelerin vefk-i matlûb-ı hümâyûnum üzere müddet-i kalîlede inşâ ve tekmîllerine vesîle-i yüsr-i suhûlet olmak içün iktizâ eden on iki bin sekiz yüz kıt‘a ecnâs-ı kerestenin başmuhâsebeden ihrâc ve irsâl olunan mümzâ ve sûret-i defterde terkīm ve tasrîh olunduğu üzere îcâb eden ücret-i kat‘ ve nakilleri emîn-i mûmâ-ileyh tarafından an-nakdin verilmek şartıyla ol mikdâr ecnâs-ı kereste Kartal ve Gekbûze ve Yoros ve Şile ve Akâbâd ve Taşköprü kazâ ve nâhiyeleri dâhillerinde vâki‘ hâssa korularımdan zikr olunan kazâ ve tevâbi‘i ahâlîleri ma‘rifetleriyle kat‘ ve nakletdirilmek fermânım olmağın hâssaten işbu emr-i celîlü’l-kadrim ısdâr ve tersâne-i âmirem <> emîni çukadârı el-Hâc Ali mübâşeretiyle irsâl olunmuşdur imdi vusûlünde sen ki bostancıbaşı-yı mûmâ-ileyhsin zikr olunan on iki bin sekiz yüz kıt‘a ecnâs-ı kerestenin ucâleten ve müsâra‘aten kat‘ ve nakilleri ehemm ve mühimm-i lâzımü’l-ihtimâmdan idiği ma‘lûmun oldukda bu bâbda kat‘â te’hîr ve rehâvete cevâz ve ruhsat göstermeyüp başmuhâsebeden verilen mümzâ sûret-i defter mûcebince îcâb eden ücret-i kat‘iye ve nakliyeleri emîn-i mûmâ-ileyh tarafından tamâmen ve kâmilen an-nakdin verilmek şartıyla tarafından mu‘temed mübâşirler ta‘yîn edüp ol mikdâr ecnâs-ı keresteyi zikr olunan kazâ ve tevâbi‘i dâhillerinde vâki‘ hâssa korularımdan zikr olunan kazâ ve tevâbi‘i ahâlîlerine ucâleten ve müsâra‘aten kat‘ ve nakletdirilmek husûsuna bezl ü sa‘y ve tekayyüd eyleyüp rızâ-i hümâyûnum-ı Husrevâneme mugāyir tekâsül ve rehâvet misillü harekâtdan tehâşî ve mübâderet eyleyesiz ve siz ki kuzât ve nüvvâb ve a‘yân-ı vilâyet ve iş erlerisiz sizin dahi mûcib-i emr-i şerîfim üzere amel ve hareket eylemeniz bâbında fermân-ı âlîşânım sâdır olmuşdur buyurdum ki hükm-i şerîfimle vardıkda bu bâbda vech-i meşrûh üzere şeref-yâfte-i sudûr eden işbu emr-i şerîf-i celîlü’ş-şân-ı vâcibü’l-ittibâ‘ ve lâzimü’l-imtisâlimin mazmûn-ı münîfi birle âmil olasız şöyle bilesiz alâmet-i şerîfe i‘timâd kılasız. Fî-gurreti Ramazan sene [1]183