Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 369 Hüküm no: 423 Orijinal metin no: [58b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nazver bt. Abdullah’ın vakıf arsası üzerindeki evinin mülkiyetini Ali Bey b. Ebûbekir Paşa’ya devrettiği Mahmiye-i İstanbul’da Samatyakapısı kurbunda Çıkrıkçı Hüseyin Bey mahallesinde sâkine Nazver bt. Abdullah nâm hâtun meclis-i şer‘-i hatîrde zevci bâ‘isü’l-kitâb Ali Bey b. el-merhûm Ebûbekir Paşa mahzarında ikrâr ve takrîr-i merâm kelâm edip arsasının senede Medîne-i Münevvere vakfı’na yüz yirmi akçe mukāta‘ası ve binâsı mülküm olup mahalle-i mezbûrede vâki‘ bir tarafdan odabaşı Hasan Bey mülkü ve bir tarafdan leğenci Mehmed Çelebi mülkü ve bir tarafdan yorgancı Ahmed Çelebi mülkü ve bir tarafdan tarîk-i âm ile mahdûd hâriciyyesi iki bâb fevkānî oda ve bir ahır ve bir samanlık ve bir kenîf ve dâhiliyyesi iki bâb tahtânî oda ve bir sofa ve bir camekânlı bir halvetli hamam ve bir matbah ve üç su kuyusu ve hadîkayı müştemil menzilin mülk olan binâsı merkūm Ali Bey tarafından îcâb ve kabûlü hâvî bey‘-i bâtt-ı sahîh-i şer‘î ile kırk altı bin akçeye bey‘ ve teslîm edip ol dahi vech-i muharrer üzre iştirâ ve kabûl eyledikden sonra arsasını dahi mütevellî-i vakf-ı mezbûr izni ile merkūm Ali Bey’e meccânen ferâğ ve tefvîz ol dahi tefevvuz ve kabûl edip semeni olan meblağ-ı mezbûrun otuz iki bin akçesini yedinden ahz ve kabz edip on dört bin akçesi merkūm Ali Bey zimmetinde kalmışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Recebi’l-ferd sene seb‘a ve seb‘în ve elf. Şuhûdü’l-hâl: İlyas Efendi el-İmâm, Ahmed Ağa el-Müezzin, Mehmed Çelebi b. Yusuf, Ebûbekir Bey el-Cündî, Hacı Habib, fahrü’l-kuzât es-Seyyid Hasan Efendi.