Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 370 Hüküm no: 424 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Polo Reis’in, eski karısı Foti bt. Kiryako’ya açtığı ev arsası davasında anlaştıkları Medîne-i Sinop mahallâtından Saray mahallesi sükkânından olup gemici tâifesinden olan Yani v. Polo Reis nâm zimmî meclis-i şer‘-i hatîr-i lâzımü’t-tevkīrde sâbıkan zevcesi olan işbu bâ‘isetü’s-sifr Foti bt. Kiryako nâm nasrâniye muvâcehesinde ikrâr-ı tâm ve takrîr-i kelâm edip mezbûre Foti’nin mülkü olmak üzre yedinde olup medîne-i Galata’ya tâbi‘ İstinye nâhiyesi müzâfâtından Yeniköy’de Papapoli mahallesinde vâki‘ bir tarafdan neccâr Yorgi mülkü ve bir tarafda Kostantin zimmî mülkü ve bir tarafdan tarîk-i âm ile mahdûd bir bâb fevkānî oda ve bir sofa ve bir kenîf ve havluyu müştemil olan menzilin binâsı mezbûre Foti’nin ve tûlen ve arzen bi hesâb-ı terbî‘î iki yüz otuz bir zirâ‘ arsası benim mülkümdür deyû mukaddemâ da‘vâ ettiğimde, ol dahi inkâr etmekle beynimizde münâza‘ât-ı kesîre ve muhâsamât-ı şedîde vakı‘a olmuşdu el-hâletü hâzihî muslihûn tavassut edip mezbûre Foti ile beynimizde bin akçe üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr bin akçeyi merkūme Foti yedinden tamâmen ahz u kabz edip menzil-i mezbûr[a] müte‘allika âmme-i de‘âvîden zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Mustafa Çavuş b. Yahya Efendi, aşçı Mehmed Çavuş b. ( ), İbrahim Çavuş b. Abdullah, İbrahim Çelebi [b.] Ahmed, Baba Resul b. Rıdvan.