Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 381 Hüküm no: 439 Orijinal metin no: [60b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Nasto’nun, birkaç defa satılıp el değiştiren evi hususundaki davada sulh olduğu Kürkçü tâifesinden olup Dârü’l-hilâfeti’l-aliyye Kostantıniyye el-mahmiyye hısn-ı ebvâbından Samatyakapısı dâhilinde Zeytun mahallesi sükkânından olan Mihal v. Nasto nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda fahrü’l-akrân ve’l-ekfâ Receb Ağa b. Mustafa nâm kimesne mahzarında bi’t-tav‘i’s-sâf ikrâr ve i‘tirâf edip mahrûse-i Galata müzâfâtından kasaba-i Beşiktaş mahallâtından Sinan Paşa mahallesinde vâki‘ bir tarafdan Arabzâde mülkü ve bir tarafdan Aslan oğlu mülkü ve iki tarafdan tarîk-i âm ile mahdûd dört bâb fevkānî oda ve iki sofa ve bir köşk ve iki mahzen ve bir matbah ve bir su kuyusu ve hadîkayı müştemil mülk menzilimi cemî‘ tevâbi‘ ve levâhıkı ve âmme-i hukūk ve merâfıkı ile bin yetmiş senesi Cumâdelûlâsı’nın onuncu gününde mûmâ-ileyh Receb Ağa’ya bin dört yüz aded frengî altına bey‘ ve teslîm edip ol dahi iştirâ ve tesellüm eyledikden sonra işbu hâzır bi’l-meclis Ali Ağa b. Mustafa’ya dokuz yüz on beş kıt‘a guruş semen-i makbûza bey‘ ve teslîm edip ol dahi ba‘de’l-iştirâ ve’t-tesellüm işbu hâzır bi’l-meclis bakkal Panayot v. Yorgi’ye bin elli kıt‘a esedî guruş semen-i makbûza bey‘ ve teslîm edip ol dahi iştirâ ve tesellüm eyledikden sonra bundan akdem semen-i mezbûr dört yüz frengî altın zimmetinde kalmış idi deyû müşârün-ileyh Receb Ağa’dan da‘vâ eyledikde, beynimizde münâza‘ât-ı şedîde [61a] ve muhâsamât-ı ekîde vâki‘ olmuşidi el-hâletü hâzihî muslihûn tavassut edip mûmâ-ileyh Receb Ağa ile beynimizde nakid râyic fi’l-vakt beş bin akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezkûru tamâmen yedinden alıp kabz edip menzil-i mezbûra müte‘allika âmme-i de‘âvî ve mütâlebâtdan mûmâ-ileyh Receb Ağa’yı ve mezbûrûn Mustafa Ağa ve Bakkal Panayot’u ibrâ-i âmm-ı kātı‘ü’n-nizâ‘ ile ibrâ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Beşe b. Hayreddin, Sefer Beşe b. Yusuf, İbrahim Çelebi b. Abdullah, fahrü’l-akrân Mehmed Çelebi b. ( ) Kethüdâ-yı muhzırân, Hasan Beşe b. ( ) Çukadâr.