Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 380 Hüküm no: 438 Orijinal metin no: [60b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun bt. Abdullah’ın ev ve dükkânlarını el-Hâc İbrahim Ağa b. el-Hâc Hasan’a sattığı Dârü’l-hilâfeti’l-aliyye Kostantıniyye el-mahmiyye mahallâtından Macuncu Kasım mahallesi sâkinelerinden fahrü’l-muhadderât Âişe Hâtun bt. Abdullah tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân olan el-Hâc Mirza b. Musa ve Ahmed b. Ali nâm kimesneler şehâdetleri ile şer‘an vekâleti sâbite olan Nasuh Beşe b. Musa nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de müvekkile-i mûmâ-ileyhânın zevci işbu bâ‘isü’l-kitâb fahrü’l-akrân ve’l-ekfâ el-Hâc İbrahim Ağa b. el-Hâc Hasan mahzarında ikrâr ve takrîr-i kelâm edip müvekkile-i mûmâ-ileyhânın bin yetmiş senesi Şa‘bânı’nda mahmiye-i mezbûre mahallâtından Sarrâc Doğan mahallesinde vâki‘ bir tarafdan müşârün-ileyh el-Hâc İbrahim Ağa’nın mülkü ve bir tarafından Hacı Hüseyin nâm kimesne tasarrufunda olan menzil ve bir tarafdan Hatice nâm hâtun mülkü ve bir tarafdan tarîk-i âm ile mahdûd fevkānî bir bâb ve tahtânî bir bâb odalar ve bir su kuyusu ve cüneyne ve bir kenîfi müştemil mülk menzili ile yine mahalle-i mezbûrede vâki‘ iki tarafdan yine müşârün-ileyh el-Hâc İbrahim Ağa mülkü ve bir tarafdan Hatice Hâtun mülkü ve bir tarafdan tarîk-i âm ile mahdûd biribirine muttasıl birisi terzi dükkânı ve birisi attâr dükkânı olan iki kepenk dükkânlarını cemî‘ tevâbi‘ ve levâhıkıyla ve âmme-i hukūk ve merâfıkları ile tarafeynden îcâb ve kabûlü ve şurût-ı müfsideden ârî bey‘-i bâtt-ı sahîh-i şer‘î ile bi safkatin vâhidetin müşârün-ileyh el-Hâc İbrahim Ağa’ya iki yüz kıt‘a esedî guruşa bey‘ ve teslîm edip ol dahi iştirâ ve kabûl ve tesellüm eyledikden sonra semenleri olan iki yüz kıt‘a esedî guruşun yüz elli kıt‘a esedî guruşunu târih-i mezkûrda müşârün-ileyh el-Hâc İbrahim Ağa yedinden alıp kabz edip elli kıt‘a esedî guruşu zimmetinde bâkī kalmış idi, hâliyâ meblağ-ı bâkī-i mezbûr yüz elli kıt‘a esedî guruşu dahi müşârün-ileyh İbrahim Ağa yedinden tamâmen alıp kabz eylemeğin zikr olunan menzil ve dükkânlarda ve semenlerinde müvekkile-i mûmâ-ileyhânın kat‘â alâka ve medhali kalmamışdır dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Abdullah Efendi el-İmâm, Mehmed Efendi el-İmâm, Hasan Halîfe b. ( ) el-Müezzin, Hoca Ahmed b. ( ), Solak Yusuf b. Abdullah, el-Hâc Mehmed b. Ahmed, Zülfikār b. Abdullah.