Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 491 Hüküm no: 604 Orijinal metin no: [93b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Mahmud’un meyve ağaçlarına sahiplik iddiasının reddi Havâss-ı Aliyye kazâsına tâbi‘ Küçükçekmece nâhiyesi müzâfâtından Büyükhalkalı nâm karye sâkinelerinden işbu râfi‘atü’l-kitâb Ümmühâni bt. Süleyman nâm hâtun meclis-i şer‘-i şerîfde mahmiye-i İstanbul’da Davudpaşa kurbunda sâkin Ramazan b. Mahmud nâm kimesne mahzarında üzerine da‘vâ ve takrîr-i kelâm edip merkūm Ramazan’a târih-i kitâbdan iki sene mukaddem karye-i mezkûrede vâki‘ lede’l-ahâlî ma‘lûmü’l-hudûd tahmînen bir keyl tohum istî‘âb eder bir kıt‘a tarlamın hakk-ı tasarrufunu ma‘rifet-i sâhib-i arz ile fâriğa olmuş idim lâkin zikr olunan tarlada mağrûs üç aded ceviz ve sâir eşcâr-ı müsmire benim mülküm iken istîcâr-ı mezkûrı merkūm Ramazan’a bey‘ etmemişiken hâlâ zikr olunan üç aded ceviz ve sâir eşcâr-ı müsmireye bi gayri hakkın vaz‘ murâd edip benim zabt ve tasarrufuma mâni‘ olur suâl olunup men‘ ve def‘ olunmak matlûbumdur dedikde gıbbe’s-suâl mezbûr Ramazan cevâbında fi’l-hakīka müdde‘iyye-i merkūme Ümmühâni sâlifü’z-zikr tarla içinde mağrûs olan eşcâr-ı merkūme ile ma‘an fâriğa olmuşdur deyû cevâb vericek isre’l-istintâk ve akībe’l-inkâr, merkūm Ramaz[an’]dan takrîrine [93(2)a] mutâbıka beyyine taleb olundukda ityân-ı beyyineden izhâr-ı acz edip istihlâf dahi etmeğin merkūm Ramazan bilâ-beyyine mezbûre Ümmühâni’ye bî-vech mu‘ârazadan men‘ ve def‘ olunup mâ vaka‘a bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hüseyin Efendi b. Ahmed, Mehmed b. Eyüb, Hüseyin Çelebi b. Ali, Yusuf b. Abdullah.