Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 492 Hüküm no: 605 Orijinal metin no: [93(2)a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe’nin Mustafa Paşa’nın ağalarından İbrahim Ağa’dan gaspettiği köleleriyle eşyalarını iade etmesi Düstûr-ı mükerrem müşîr-i müfahham vezîr-i sânî müsâhib-i şehriyârî devletlü ve sa‘âdetlü Mustafa Paşa hazretlerinin ağalarından işbu râfi‘ü’l-kitâb fahrü’l-eşbâh İbrahim Ağa b. Mehmed meclis-i şer‘-i şerîfde sâbıkan hizmetkârı olup otuz üç avcılar odasında yoldaş olan Hüseyin Beşe b. Veli mahzarında üzerine da‘vâ ve takrîr-i kelâm edip ben vilâyet-i Anadolu’da Küre-i Nühâs’da sâkin iken mezbûr Hüseyin Beşe târih-i kitâbdan iki ay mukaddem abd-i memlûküm olup gāibân ani’l-meclis uzun boylu, açık kaşlı, gök gözlü Rûsiyyü’l-asl Şâhin b. Abdullah ve yine orta boylu, kara kaşlı, kara yağız Rûsiyyü’l-asl tahmînen on sekiz yaşında Babacık b. Abdullah nâm abd-i memlûklerimi idlâl edip emlâkimden bir na‘l pâre tüfenk ve bir beyaz muhattam ve bir neftî çuka dolama ve bir sîm kemer raht ve yüz üç esedî guruş ve bir sîm hançer ve bir sîm bıçağımı dahi ahz edip abd-i memlûklerim mezbûrân ile firâr etmişlerdir suâl olunup takrîri tahrîr ve mezbûrân Şâhin ve Babacık ve eşyâ-i mezkûrenin aynlar mevcûd ise aynlarını müstehlek ise kıymet-i şer‘iyyelerini alıverilmek matlûbumdur dedikde gıbbe’s-suâl mezbûr Hüseyin Beşe cevâbında fi’l-hakīka târih-i mezkûrda müdde‘î-i mezbûr İbrahim Ağa’nın emlâkinden mezbûrân Şâhin ve Babacık nâm abd-i memlûklerini idlâl ve sâir eşyâsından bir na‘l pâre tüfenk ve bir muhattam ve bir neftî dolamasını ahz ve kabz ve firâr eyledim deyû tav‘an ikrâr ve i‘tirâf edip mâ‘adâ yüz üç esedî guruş ile bir sîm kemer raht ve bir sîm hançer ve bir sîm bıçağı inkâr edicek ikrâr mertebesi olan mezbûrân Şâhin ve Babacık ile zikr olunan tüfenk ve muhattam ve dolamanın aynları mevcûd ise aynlarını müstehlek ise kıymet-i şer‘iyyelerini müdde‘î-i merkūma edâ ve teslîme mezbûr Hüseyin Beşe’ye tenbîh birle mâ vaka‘a bi’t-taleb ketb olundu. Fi’l-yevmi’s-sâdis min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: El-Hâc Mahmud b. Mehmed, Musa Bey Subaşı, Durmuş b. ( ) Odabaşı, Hüseyin Beşe, Mustafa Bey, Hüseyin b. Yahya.