Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 495 Hüküm no: 610 Orijinal metin no: [93(2)b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Beşe b. Receb’in kölesi Kenan b. Abdullah’ı azat etmesi Mahmiye-i İstanbul’da Mi‘mâr Sinan mahallesi sükkânından Veli Beşe b. Receb tarafından ıtk-ı âti’l-beyânı ikrâra vekîl olup nehc-i şer‘î ve tarîk-i mer‘î üzre şer‘an vekâleti sâbite olan karındaşı Hüseyin Beşe b. Receb meclis-i şer‘-i hatîr-i lâzımü’t-tevkīrde müvekkil-i mezbûrun kendiye rıkkını mu‘terif işbu orta boylu, açık kaşlı, elâ gözlü Rûsiyyü’l-asl râfi‘ü’l-vesîka Kenan b. Abdullah nâm abd-i memlûkü mahzarında bi’l-vekâle ikrâr-ı tâm ve takrîr-i kelâm edip müvekkil-i mezbûr Veli Beşe mevsûf-ı mezkûr Kenan’ı cemî‘ malından ifrâz edip hasbeten lillâhi te‘âlâ ve hasbeten li rûhi resûlihi’l-mu‘allâ i‘tâk ve tahrîr ve zümre-i ahrâr-ı asliyyeye idrâc ve ilhâk eyledim ba‘de’l-yevm mevsûf-ı merkūm Kenan sâir ahrâr-ı asliyyîn gibi hür olup mevâlî-i utekā için sâbit olan hakk-ı velâdan gayrı üzerinde hakkım kalmadı dedi dedikde mâ cerâ bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek fî seneti’l-mezbûr. Şuhûdü’l-hâl: Şaban Beşe b. Receb, Ramazan b. Hasan, Mehmed b. Mahmud, Mehmed Çelebi b. Eyüb, Nasuh Efendi b. Abdüsselâm.