Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 494 Hüküm no: 609 Orijinal metin no: [93(2)b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Taşçı Yano v. Vasil’in güveççi fırınındaki aletlerini Nano, Hristo ve Tanaş evlâd-ı Minho’ya satması Mahmiye-i İstanbul’da vâki‘ taşçı tâifesinden Yano v. Vasil nâm zimmî meclis-i şer‘-i şerîf-i lâzımü’t-tevkīrde râfi‘ü hâze’r-rakīm diğer Nano ve Hristo ve Tanaş evlâd-ı Minho nâm zimmîler muvâcehelerinde ikrâr ve takrîr-i kelâm edip mezbûrûn ile ale’l-iştirâki’s-seviy silk-i mülkümüzde münselik olup Havâss-ı Aliyye kazâsına tâbi‘ İncirli nâm karye kurbunda Domuzdamı nâm mahalde vâki‘ bir tarafı İstiko zimmî mülkü ve bir tarafı Yazıcı [v.] Nano zimmî mülkü ve iki tarafı tarîk-i âm ile mahdûd bir bâb tahtânî odayı müştemil güveççi fırınında ve içinde mevcûd âlâtda olan nısf hisse-i şâyi‘amı cemî‘ tevâbi‘i ile mezbûrûn Nano ve Hristo ve Tanaş’a ale’l-iştirâki’s-seviy üç bin altı yüz fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm anlar dahi ber vech-i muharrer iştirâ ve tesellüm ve kabz ve kabûl eylediklerinden sonra semeni olan meblağ-ı mezbûr üç bin altı yüz akçeyi mezbûrûn Nano ve Hristo ve Tanaş yedlerinden bi’t-tamâm ahz ve kabz eyledim ba‘de’l-yevm zikr olunan nısf hissede alâka ve medhalim yokdur mezbûrûn Nano ve Hristo ve Tanaş’ın ale’l-iştirâk mülk-i müşterâları olmuşdur keyfe mâ yeşâ’ mutasarrıflar olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb [olundu]. Fi’l-yevmi’s-sânî aşer min şehri Ramazâni’l-mübârek fi’s-seneti’l-mezbûr. Şuhûdü’l-hâl: Osman b. Hüseyin, Hüseyin b. Ali, Hüseyin b. Bey, Mehmed b. Mustafa, Mehmed b. Eyüb, Yazıcı [v.] Nano, Kosta [v.] Vasil, Andriye [v.] Nano, Kosta [v.] Nano, Nano [v.] Tanaş, Vasil Yani [v.] Nano, Nano [v.] Nes, Tanaş [v.] Tono, Yano [v.] Beno, Tanaş [v.] Culak