Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 498 Hüküm no: 614 Orijinal metin no: [94b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah Efendi b. Mehmed’in ev hissesini borç karşılığı Camcı Ahmed Vakfı mütevellisine devri Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Davud Ağa mahallesi sükkânından Abdullah Efendi b. Mehmed meclis-i şer‘-i hatîr-i lâzımü’t-tevkīrde medîne-i mezbûrede vâki‘ merhûm Camcı Ahmed vakfı’na bi’l-fi‘l mütevellî olan işbu râfi‘ü’l-kitâb Mehmed Çelebi b. Eyüb mahzarında tav‘an ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan mefharü’l-mevâliyyi’l-kirâm Şeyhzâde Mehmed Efendi mülkü ve bir tarafdan Ağa İmâmîzâde çorbacı Mehmed Ağa mülkü ve bir tarafdan tarîk-i hâs ve bir tarafdan tarîk-i âm ile mahdûd olup hâriciyyede ve dâhiliyyede büyût-ı adîde ve bir halvetli hamamı ve mâ-i cârîyi ve hadîkayı müştemil mülk menzilde olan bin seksen sehimden seksen sehim hisse-i şâyi‘amı mütevellî-i mezbûr Mehmed Çelebi’ye târih-i kitâbdan üç yüz altmış gün tamâmına değin bey‘ bi’l-vefâ tarîki ile altmış dokuz kıt‘a esedî guruşa bey‘ edip ol dahi tarîk-i merkūm üzre mâl-ı vakf-ı mezkûr ile iştirâ ve kabûl eyledikden sonra semeni olan meblağ-ı mezbûr altmış dokuz guruşu mütevellî-i mezbûr Mehmed Çelebi yedinden bi’t-tamâm ve’l-kemâl ahz ve kabz eyledim eğer meblağ-ı mezkûru ecel-i merkūm hulûlünde mütevellî-i mezbûr Mehmed Çelebi’ye edâ ve teslîm edemezsem bey‘-i mezkûr bâtta münkalib olsun dedikde gıbbe’t-tasdîki’ş-şer‘î mukırr-ı mezbûr Abdullah Efendi’nin zevcesi Havva bt. Abdullah nâm hâtun mütevellî-i mezbûr mahzarında bi tav‘ihâ ikrâr edip meblağ-ı mezkûra ve hisse-i mezbûrenin derkine kefîl olmağla bu mahalle kayd olundu. Mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Nasuh Efendi b. Abdüsselâm, Mehmed Çelebi b. Mustafa, Hüseyin Beşe b. Receb Çukadâr, Hüseyin Çelebi b. Ali, Mehmed Çelebi b. Mustafa.