Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 499 Hüküm no: 615 Orijinal metin no: [94b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Osman’ın evini Metro v. Todori’ye satması Vilâyet-i Rumeli’nde Arnavud Belgradı kazâsına tâbi‘ Sadadca nâm karye ahâlîsinden Ali b. Osman meclis-i şer‘-i hatîr-i lâzımü’t-tevkīrde işbu râfi‘ü’r-rakīm Metro v. Todori nâm zimmî muvâcehesinde ikrâr ve i‘tirâf edip akd-i âtî sudûruna değin yedimde mülküm ve hakkım olup karye-i mezbûrede vâki‘ bir tarafı Kosta nâm zimmî mülkü ve bir tarafı Tori nâm zimmî mülkü ve bir tarafı Kolu nâm zimmî mülkü ve bir tarafı tarîk-i âm ile mahdûd bir bâb tahtânî oda ve bir mikdâr bahçe ve iki dip zeytin ağacı ve dokuz dip incir ağacı ve muttasıl tahmînen on iki çapalık bir kıt‘a bağı müştemil mülk menzilimi cemî‘ tevâbi‘i ile ve içinde mevcûd bir fıçı ve bir şırahâneyi mezbûr Metro’ya bi safkatin vâhidetin beş bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûr beş bin akçeyi mezbûr Metredi yedinden bi’t-tamâm ahz ve kabz eyledim ba‘de’l-yevm emlâk-i mezbûrda vechen mine’l-vücûh alâka ve medhalim yokdur mezbûr Metro’nun mülk-i müşterâsı olmuşdur keyfe mâ yeşâ’ mahallinde zabt ve tasarrufa mezbûr Metro’yu taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hüseyin b. Ali, Mehmed b. Eyüb, Ali b. Abdullah, Yusuf b. Abdullah, Dimo [v.] Yani, Martik [v.] Tibo, Pilyo? [v.] Niko, Dimitri v. Niko, Dimo [v.] Kiko.