Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 135 Hüküm no: 159 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma-i hümayun ihtiyacı için Kartal’daki koru-yı hümayundan kereste kesilip naklettirilmesi hakkındaki emre muhalefet edenlerin cezalandırılacağı İftiharü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti’l-meliki’d-dâ’im hâssa bostancı olan -dâme mecdühû- ve kıdvetü’n-nüvvâbi’l-müteşerri‘în Kartal nâibi mevlânâ -zîde ilmühû- ve mefâhirü’l-emâsil ve’l-akrân zâbitân ve -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki işbu sene-i mübârekde koru-yı hümâyûnuma merbût kazâlardan ince donanma-i hümâyûnum sefîneleri inşâları’çün emr-i şerîfimle matlûb olan on iki bin sekiz yüz aded ecnâs-ı keresteyi Gekbûze ve Taşköprü ve Şile ve Akâbâd ve Yoros kazâları ahâlîleri kat‘ ve nakle ta‘ahhüd edüp yalnız Kartal kazâsı ahâlîsi bîhûde ta‘allül ve muhâlefet ve hisselerine isâbet eden iki bin iki yüz elli aded ecnâs-ı keresteyi kat‘ ve nakle mümâna‘at ve ahâlîlerinden Hüseyin ve Osman nâm kimesneler husûs-ı mezbûrun avk u te’hîrine bâ‘is oldukları kereste-i merkūmenin kat‘ ve nakline mübâşir ta‘yîn olunan hâssa hasekilerinden koru-yı hümâyûnum zâbiti Mustafa -zîde kadruhû- ve hisselerine isâbet eden ol mikdâr keresteyi bir gün evvel koru-yı hümâyûnumdan kat‘ ve nakl ve mîrî fiâtı üzere ma‘rifet-i şer‘le kayık isticâr ve bir sâ‘at mukaddem tersâne-i âmireme îsâle müsâra‘at eylemeleri’çün te’kîdi hâvî size hitâben emr-i şerîfim sudûrunu istid‘âsı üzere emr-i şerîfim sudûrunu hâlâ tersâne-i âmirem emîni iftihârü’l-emâcid ve’l-ekârim el-Hâc Yusuf -dâme mecdühû- takrîriyle iltimâs eylediğine binâen vech-i meşrûh üzere amel olunmak fermânım olmağın sen ki bostancı-i mûmâ-ileyhsin kat‘ ve nakle fermânım olan keresteden Kartal nâhiyesine isâbet eden iki bin iki yüz elli aded ecnâs-ı keresteyi bir gün evvel koru-yı hümâyûnumdan kat‘ ve nakl ve mîrî fiâtı üzere ma‘rifet-i şer‘le kayıklar isticâr ve bir sâ‘at mukaddem tersâne-i âmireme îsâl etdirmeye mezîd-i müsâra‘at ve siz ki mevlânâ ve sâir mûmâ-ileyhimsiz husûs-ı mezkûr umûr-ı müsta‘cele-i mîriyeden olduğu ma‘lûmunuz oldukda siz dahi bi’l-ittifâk bu bâbda ihtimâm ve dikkat ve muhâlefet edenler <> eşedd-i ukūbet ile mu‘âkab olunacaklarını cümleye ifâde ve îşâ‘at ederek kereste-i merkūmenin bir gün akdem ve bir sâ‘at mukaddem tersâne-i âmireme sevk u îsâle sa‘y ü gayret ve sarf-ı tâb ü tâkat eyleyüp ser-i mû iğmâz ve müsâmahadan ve şehâmeti tarafınıza râci‘ olunacak vaz‘ u hâletden her biriniz gāyetü’l-gāye hazer ve mücânebet eylemeniz bâbında fermân-ı âlîşânım sâdır olmuşdur buyurdum ki hükm-i şerîfim vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzimü’l-imtisâlimin itâ‘at-makrûnu ile âmil olup hilâfından gāyetü’l-gāye tehâşî ve mücânebet eyleyesiz şöyle bilesiz alâmet-i şerîfe i‘timâd kılasız. Tahrîren fî-evâsıtı Şevvâli’l-mükerrem li-sene selâse ve semânîn ve mi’ete ve elf. Mûcebince mektûb-ı bostancı ağa