Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 505 Hüküm no: 624 Orijinal metin no: [96a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Sinan’ın evini Ümmühani bt. Hüseyin’le Eyüb b. Hüseyin’e satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Davud Ağa mahallesi sâkinelerinden İsmihân bt. Sinan nâm hâtun tarafından husûs-ı âti’l-beyânı ikrâra vekîl olup hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Ali Çelebi b. Mustafa ve Mehmed b. Hasan nâm kimesneler şehâdetleri ile şer‘an vekâleti sâbite olan li ebeveyn er karındaşı Mehmed Çelebi b. Sinan meclis-i şer‘-i hatîr-i lâzımü’t-tevkīrde işbu bâ‘iseyi’l-kitâb Ümmühâni bt. Hüseyin nâm hâtun ile sadrî kebîr oğlu Eyüb b. Hüseyin nâm kimesne mahzarlarında bi’l-vekâle ikrâr-ı tâm ve takrîr-i kelâm edip kız karındaşım müvekkile-i mezbûre İsmihân akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Ali Beşe mülkü ve bir tarafı Bîzebân Süleyman Ağa vakfı ve bir tarafı mekābir-i müslimîn ve iki tarafı tarîk-i hâs ile mahdûd bir bâb fevkānî ve bir bâb tahtânî odaları ve zât-ı eşcâr-ı müsmire ve gayr-ı müsmire bahçeyi ve bi’r-i mâyı ve kenîf ve havlu[yu] müştemil mülk menzilin sülüsünü mezbûre Ümmühâni Hâtun’a elli esedî guruşa ve sülüsânını mezbûr Eyüb’e yüz esedî guruşa ki cem‘an yüz elli esedî guruşa cemî‘ tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ u teslîm anlar dahi minvâl-i muharrer üzre iştirâ ve tesellüm ve kabz ve kabûl eylediklerinden sonra semeni olan meblağ-ı mezbûr yüz elli esedî guruşu mezbûre Ümmühâni ve Eyüb yedlerinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim kalmadı sülüsü mezbûre Ümmühâni ve sülüsânı mezbûr Eyüb’ün mülk-i müşterâları olmuşdur keyfe mâ yeşâ’ân mutasarrıflar olsunlar dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hasan Efendi b. Mansur el-İmâm, Nasuh Efendi b. Abdüsselâm, Ahmed b. Bâli, Mustafa b. Hamza, Mustafa b. Abdullah baklava, Mahmud b. Hasan, Ahmed b. Hüseyin, Mehmed b. Eyüb.