Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 505 Hüküm no: 623 Orijinal metin no: [95b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zâhide bt. Abdullah’ın evini Ömer Beşe b. Abdullah’a satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Çavuş Kasım mahallesi sâkinelerinden Zâhide bt. Abdullah nâm hâtunun sadrî kebîr oğlu ve tarafından husûs-ı âti’l-beyânı ikrâr[a] vekîl olup hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Mustafa b. Mehmed ve Hasan ve Abdullah nâm kimesneler şehâdetleriyle şer‘an vekâleti sâbit olan Mehmed Çelebi b. Arslan nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ömer Beşe b. Abdullah nâm kimesne mahzarında bi’l-vekâle ikrâr-ı tâm ve takrîr-i kelâm edip vâlidem müvekkile-i merkūme Zâhide Hâtun akd-i âti’z-zikr sudûruna değin silk-i mülkünde münselik olup mahalle-i mezbûrede vâki‘ bir tarafdan Ömer nâm kimesne mülkü ve bir tarafdan Süleyman Bey mülkü ve iki tarafdan tarîk-i âm ile mahdûd bir bâb tahtânî odayı ve havluyu müştemil mülk menzilini bi cümleti’t-tevâbi‘ ve’l-levâhık mezbûr Ömer Beşe’ye dokuz bin beş yüz akçeye tarafeynden îcâb ve kabûlü hâvî bey‘-i bâtt-ı [96a] sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezbûr dokuz bin beş yüz akçeyi mezbûr Ömer Beşe yedinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâkam kalmadı mezbûr Ömer Beşe’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedi dedikde [gıbbe]’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Ramazâni’l-mübârek [li sene] ihdâ ve tis‘în ve elf. Şuhûdü’l-hâl: Ahmed Ağa b. Mahmud, Abdullah Efendi b. Abdullah el-Müezzin, Mehmed Çelebi b. Mustafa, Hüseyin Çelebi b. Ali.