Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 507 Hüküm no: 626 Orijinal metin no: [96a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ahmed b. Abdullah’ın borçlularından tahsilat yapmak üzere vekil olan İbrahim’in zimmetinin ibrası Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de merhûm Koca Kasım Paşa mahallesi sâkinlerinden iken bundan akdem vefât eden Ahmed b. Abdullah’ın verâseti zevce-i metrûkesi Sâliha bt. Mustafa nâm hâtun ile sulbiye sagīre kızları Fâtıma ve Hanife ve Râbia[’ya] münhasıra olduğu şer‘an zâhir ve mütehakkik oldukdan sonra sagīrât-ı mezbûrâtın vâlideleri ve kıbel-i şer‘den mansûbe vasîleri olan merkūme Sâliha meclis-i şer‘-i şerîfde işbu râfi‘ü’l-kitâb İbrahim b. Abdullah nâm kimesne mahzarında bi’l-vesâye ikrâr-ı tâm ve takrîr-i kelâm edip zevcim müteveffâ-yı mezbûr Ahmed’den irsen sagīrât-ı mezbûrâta intikāl edip zimem-i nâsda olan hukūk-ı cem‘ ve tahsîle bundan akdem vesâyetim hasebiyle mezbûr İbrahim[’i] tarafımdan vekîl edip ol dahi vekâlet-i merkūmeyi kabûl etmiş idi hâlâ merkūm İbrahim gāibân ani’l-meclis taşçı Hasan nâm kimesneden otuz sekiz esedî guruş ve Osman Bey nâm kimesneden otuz sekiz esedî guruş ki cem‘an yetmiş altı esedî guruş tahsîl edip meblağ-ı mezbûr yetmiş altı esedî guruşu bi’t-tamâm bana def‘ u teslîm ben dahi vesâyetim hasebiyle yedinden kabz ve tesellüm eyledim min ba‘d meblağ-ı merkūmdan mezbûr İbrahim yedinde ve zimmetinde bir akçe ve bir habbe [hakkım] kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehr-i Ramazâni’l-mübârek li sene ihdâ ve tis‘în ve elf. Şuhûdü’l-hâl: Mehmed Beşe b. Abdullah, Himmet Beşe b. Ali, Mustafa Efendi b. İsmail, Nasuh Efendi b. Abdüsselâm, Hüseyin Çelebi b. Ali.