Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 507 Hüküm no: 627 Orijinal metin no: [96b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Petro v. Dimitri’nin tarlalarının tasarruf hakkını Pemo v. Göka’ya devretmesi Vilâyet-i Rumeli’nde İstarova kazâsına tâbi‘ Humuş? nâm karye ahâlîsinden Petro v. Dimitri nâm zimmî meclis-i şer‘-i hatîr-i lâzımü’t-tevkīrde işbu râfi‘ü’r-rakīm Pemo v. Göka nâm zimmî muvâcehesinde tav‘an ikrâr-ı tâm ve takrîr-i kelâm edip tefvîz-i âti’z-zikrin sudûruna değin zabt ve tasarrufumda olup karye-i mezbûre sınırı dâhilinde vâki‘ Derbend deresi ve Kızılelma ve Gorza nâm mevâzi‘de her birinin hudûd-ı beynimizde ma‘lûm üç kıt‘a tarlalarımın hakk-ı tasarruflarını ma‘rifet-i sâhib-i arz ile merkūm Pemo’ya üç bin yüz akçe bedel mukābelesinde tefvîz ve ferâğ edip ol dahi ber vech-i muharrer tefevvuz ve kabûl eyleyip bedel-i ferâğ olan meblağ-ı mezkûr üç bin yüz akçemi mersûm Pemo yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan tarlalarda vechen mine’l-vücûh alâka ve medhalim kalmadı emsâli tasarrufu gibi mahallinde zabt ve tasarrufa merkūm Pemo’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Hasan b. Abdullah, Ali b. İslâm, Mehmed b. Eyüb, Mehmed b. Mahmud, Pemo [v.] Göka, Atanaş [v.] Pemo, Marti [v.] Peço, Kolo [v.] Peço.