Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 383 Hüküm no: 443 Orijinal metin no: [61a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Odabaşı Mehmed Çelebi’nin vârislerinin David v. Mayer’de boya bahasından alacağı olduğu iddialarını ispat edemedikleri Tüccâr tâifesinden olup bundan akdem hacc-ı şerîfe gider iken esnâ-i tarîkde vefât eden odabaşı Mehmed Çelebi’nin verâseti zevce-i metrûkesi Fâtıma bt. Mustafa Beşe nâm hâtun ile sulbî oğulları Ömer ve İbrahim nâm sagīrlere münhasıra olduğu şer‘an zâhir ve mütebeyyin oldukdan sonra sagīr-i mezbûr İbrahim’in vâlidesi ve kıbel-i şer‘den mansûbe vasîsi olan merkūm Fâtıma’nın babası ve tarafından husûs-ı âtîye vekîl-i müsecceli olan merkūm Mustafa Beşe ile diğer oğlu sagīr-i merkūm Ömer’in üvey babası ve kıbel-i şer‘den mansûb vasîsi olan Sunullah Beşe nâm kimesne meclis-i şer‘-i hatîrde Kesriye cemâ‘atinden işbu bâ‘isü’s-sifr David v. Mayer nâm Yahudi muvâcehesinde her biri vekâleten [ve] vesâyeten üzerine da‘vâ ve takrîr-i kelâm edip merkūm David zimmetinde müteveffâ-yı merkūm Mehmed Odabaşı’nın hayâtında yedimden müşterâ ve makbûz beynlerinde ma‘lûm bakkam ta‘bîr olunur boya semeninden yetmiş dokuz esedî guruş hakkı olup kable’l-ahz vefât edip meblağ-ı mezbûr bi’l-irsi’ş-şer‘î zevcesi merkūme Fâtıma ile sagīrân-ı mezbûrâna intikāl etmeğin hâlâ meblağ-ı mezkûru merkūm David’den taleb ederim suâl olunsun dediklerinde, gıbbe’s-suâl ve’l-inkâr müdde‘iyân-ı merkūmândan müdde‘âlarını mübeyyine beyyine taleb olundukda ityân-ı beyyineden her biri izhâr-ı acz edip istihlâf etmeğin fi’l-vâki‘ müteveffâ-yı mezkûr odabaşının hayâtında yedinden müşterâ ve makbûz bakkam ta‘bîr olunur boya semeninden zimmetinde edâsı lâzım yetmiş dokuz esedî guruş hakkı kalmadığına merkūm David Yahudi’ye yemîn teklîf olundukda ol dahi alâ vefki’l-mes’ûl yemîn billâhi’llezî enzele’t-Tevrâte alâ Musa aleyhi’s-selâm etmeğin mûcebince müdde‘iyân-ı mezbûrân Mustafa Beşe ve Sunullah Beşe bilâ-beyyine ta‘arruzdan men‘ olunup mâ vaka‘a bi’t-taleb ketb olundu. Fi’l-yevmi’s-sâdis aşer min Recebi’l-ferd li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Kösec Osman b. ( ), Maden Beşe b. Ramazan, Gazanfer Bey b. Tevekkül.