Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 384 Hüküm no: 444 Orijinal metin no: [61a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki Efendi b. Cafer Efendi’nin câriyesi Muammer’i âzat edip bazı ev eşyalarını kendisine hibe etti Husûs-ı âti’l-beyânın mahallinde tahrîri iltimâs olunmağın bu fakīr mahmiye-i İstanbul’da Ali Paşa-yı Atîk mahallesinde a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî Abdülbâkī Efendi b. el-merhûm Cafer Efendi’nin sâkin oldukları menzile varıp zeyl-i rakīmde mastûrü’l-esâmî olan müslimîn huzûrunda akd-i meclis-i şer‘-i şerîf olundukda müşârün-ileyh Abdülbâkī Efendi meclis-i ma‘kūd-ı mezbûrda ikrâr ve takrîr-i kelâm edip bana rıkkıyyetini mu‘terife uzun boylu, açık kaşlı, elâ gözlü Rûsiyyetü’l-asl bâ‘isetü’l-kitâb Muammer bt. Abdullah nâm câriye-i memlûkemi hasbeten lillâhi’l-Hallâk tahrîr ve i‘tâk ve zümre-i harâir-i asliyyâta idrâc ve ilhâk eyledim ba‘de’l-yevm mevsûfe-i mezbûre Muammer sâir harâir-i asliyyât gibi hürre olup üzerinde velâ-i şer‘îden gayrı hakkım kalmadı dedikden sonra müşârün-ileyh Abdülbâkī Efendi yine meclis-i ma‘kūd-ı mezbûrda mezkûr Muammer mahzarında ikrâr ve i‘tirâf edip eşyâ-i memlûkemden iki yüz dirhem bir sîm kemer kuşak ve beş aded elvân-ı mütenevvi‘a kumaş kaftan ve bir benefşe çuka ferâce ve iki benefşe çukaya kaplı tilki kürkü merkūme Muammer’e hibe-i sahîha-i şer‘iyye [61b] ile hibe ve teslîm ol dahi ittihâb ve tesellüm eyledi ba‘de’l-yevm eşyâ-i mezkûre merkūmenin emlâk-i mevhûbesidir keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Fahrü’l-kuzât Hüseyin Efendi b. Ebûbekir, zahrü’l-kuzât Derviş Mehmed Efendi b. Mehmed, Hâfız el-Hâc Mustafa b. Hacı Yusuf, Mustafa Çelebi b. ( ) Müezzin, Ahmed Efendi b. Yusuf İmâm-ı mahalle-i mezbûre, Sâlih Çelebi b. ( ) imâm-ı câmi‘-i Kethüdâ Halvetî, Hasan Efendi b. ( ) Hatîb-i câmi‘-i mezkûr, Mehmed Çelebi b. İbrahim, Halil Çelebi b. Şeyh İbrahim, Mesud b. Abdullah.