Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 511 Hüküm no: 632 Orijinal metin no: [97a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ebûbekir’in bazı eşyalarını Fâtıma bt. Hüseyin’e hibe etmesi Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Cebecibaşı mahallesi sâkinelerinden Fâtıma bt. Ebûbekir nâm hâtun meclis-i şer‘-i şerîfde işbu râfi‘ü’l-kitâb diğer Fâtıma bt. Hüseyin nâm hâtun muvâcehesinde ikrâr ve takrîr-i kelâm edip hibe-i âtiyetü’z-zikrin sudûruna değin silk-i mülk-i sahîhimde münselik emlâkimden beş beledî yastık ve dört köhne yorgan ve iki beledî döşek ve üç tencere ve dört sahan ve bir güğüm ve bir bakraç ve bir tas ve bir tava ve bir sini mezbûre Fâtıma’ya bi safkatin vâhide hibe-i sahîha-i şer‘iyye ile hibe ve teslîm ve temlîk edip ol dahi meclis-i hibede minvâl-i muharrer üzre ittihâb ve tesellüm ve temellük ve kabz eyledikden sonra ba‘de’l-yevm mârrü’z-zikr eşyâda vechen mine’l-vücûh alâka ve medhalim yokdur mezbûre diğer Fâtıma’nın mülk-i mevhûbesi olmuşdur keyfe mâ yeşâ’ mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Ramazâni’l-mübârek fi’s-seneti’l-mezbûr. Şuhûdü’l-hâl: Ali Efendi b. ( ) el-İmâm, Osman Efendi b. Mehmed, Halil Halîfe el-Müezzin, Hüseyin b. Murad, [el]-Hâc Ramazan b. Osman, Yusuf Çelebi b. Osman.